Shillong: Ka sorkar jylla da rai ko wow booh noh ya kawi ka thaw puræ yow pynbniah ya ki Doctor (MBBS) ka jylla, ka sorkar da chim ko ya ini i rai hadien wa da bichaar yei tyrwa wa da wanrah da ka chnat i chait i khiah neibhah wa duna ki Doctor wa man kam ki Specialist ha ka jylla.
Hawa klam hadien wa da wai ka yalang ka kynhun Montri, u Symbood Montri Rangbah ka jylla, u Prestone Tynsong da ong u wa ini i thaw puræ pynbniah daw man ko kawa rap hapoh ya kiwi ki puræ Doctor (Specialist) cha baar ka jylla neibhah daw em da ka Diploma Course wa 2 snem wei u man bait ko thij du ya ki Doctor yong kani ka jylla.
Da ong u wa kamwa man, hadooh katni yow lai puræ pynbniah Doctor (Specialist) cha kiwi ki jylla kam ha ka kyrdan PG wa MD daw chimpor hadooh 3 snem, wei ka jylla hadooh katni dang duna ko hadooh 121 ngut ki Doctor wa man kam ki Specialist napyrdi ki MBBS. Da ong u leh wa da ini i rai yong ka sorkar, ka jylla daw ye ko wow yoh 20-30 ngut ki Doctor wa da pynbniah man-u-snem.
Katkam wa pyntip u Prestone, i lut wow sdang ya katai ka thaw puræ u man ko kamwa T. 2 klur wei man-u-snem u man ko kamwa T.55 hadooh T.60 lak.
Ha iwi won i liang, u Tynsong da pyntip u wa ka sorkar da rai kow wo pynpsiah noh ya ki kyndon ha ka Meghalaya Nursing Council Act, 1992 wei ya kini da tip ka Draft Meghalaya Nursing Council Rules 2020, wa ka Meghalaya Nursing Council Regulations, 2020.
