Jowai : “E da ka FIR lada ympoi O cha chnong phi hapoh ar snem” da ong u kyrtong MLA na 4-Mowkaiaw Constituency, u Nehemayah Tyngkan, ynne ka sngi ha ka yalang paidbah yong ki 20 chnong wa da pynman ha Mowtyrchiah.
Da ong u wa ha kini ki snem wa dadep kiwa yoh dang yoh ki katwa kiwa dooh dang dooh ki wei katni da yoh u sakhi u yoo ya ki kari syat dor wa lai cha ki yungkrehkaam ki Block iwa mut boon du kiwa yoh donhi wa yoh kreh.
Da ong u “katni i ja ha pliang dang chah knieh wei yoo boi neini na chyoh daw chah klah” yeini da ong u hei yatoh wa ki kaam baamtooh wa da roi bha katni.
Heijooh i por da ong wa ymtoh u baamdoh ki khynroo khyllood ha kam kini ki por deiwa pynrap wa u baamdoh toh manda yoh yei roi i paar hapoh ka Mowkaiaw Constituency heitæ i por u khawai baamdoh man ka sngi.
Chooh chooh da ong u “Ka Laskein man ko u klongsnaam ka Mowkaiaw Constituency wei katni em ko ha ICU, kamwa man u nood ha u bru lada ym khih u wym em khih de kiwi ki bynta hei doh yong oo kamtæ ka thaiñ leh lada ym ku ka Laskein kammon hi ka thaiñ u ku ko” da ong u deiwa pynrap wa da toh i por wow pynku kyrdan ya ka cha ka Civil Sub-Division.
Da ong u wa da toh i por wow pynku kyrdan ya kani ka Block ya ka cha ka Civil Sub-Division yow suk u pyndep ya ki kaam kot kaam sla wei ym emkaam de u lai chadooh cha Jowai.
Chooh chooh da ong u wa sñiaw u wa sah sa kamwa T. 80 Lak ka MLA Scheme, wei ini toh neidaw wa sdang wow pynemkaam ya ka dang ha uni u snem 2017, lada kamtæ cheiwon em ko nadooh u snem 2013 hadooh 2016.
Da ong u wa ha uni u snem da haap ka Scheme hadooh T. 6 Klur ha chnong Iooksi toh wa em kiwa tieñ kiwa kwah u tympiah Vote neibhah wa daw yaleh u (Nehemayah).
Da kular u wa lada chah jied u, oo u elaad u wow kreh Contractor ki paidbah waroh kat kiwa kwah u yaleh khlem jied da kiwa yajan wa oo.
Da pynrap u deiwa ong “Nga kam u tre yung tip O yei eh i khoo ki chnong kani ka thaiñ, kamtæ nga wow klam wow yasaaid neibynta yong phi ha ka Assembly”.
U Vincent H Pala hei klam da ong u wa ka BJP katwa tip ko wym poi ko hei bor tæ tyrrooh ko nadien ya ki seiñ ri-loom.
Hei yatoh wa ki MLA kiwa da ieh kaam wa kiwa da mih na ka Congress da ong u wa emkaam wow pynchitom ya kini ki bru deiwa dam u jied ya ki, heiwa da ong u wa soo snem nachwa baamja ki chirup wa Dr. Mukul katwa katni nawon pynbaad ki ya oo kutjait hi.
Kiwi kiwa da klam ha kani ka yalang toh u MDC ka thaiñ u Winning Sungoh, wa kiwi kiwi kiwa da beiñ ya ka sorkar pyrdi hapoh ka BJP wa krehlang ka NPP deiwa kyntu wow e ki i kyrchaan pura ya u Nehemayah kam uwa mihkhmat yong ki ha kani ka kynti.
Discussion about this post