U MDC ka seiñ Congress napoh ka Rambrai Jyrngam Constituency, da pynyoo u ya dak ki chin wa kopsar da khreh u wow mih noh na ka Congress deiwa ye u pynyabi noh ya idæ cha ka seiñ All India Trinamool Congress.
Ki dak ki chin yong u Bajop wa da khreh mih noh na ka Party Congress toh wa hadien wa lai u wow ya embynta ha ka yalang psiah dkhot yong ki paidbah ka Nongthymmai Constituency ha ka yalang kawa da man ynne ka sngi.
Wei hawa yaklam wa ki laad pathai khubor, neiliang u Bajop da pynsñiaw u wa em yei thmu wei i pynkhreh wow yakhun ya ka Election MLA ka jylla kawa daw man ha u snem 2023, tangwa na ka Constituency kawa kammon wow yakhun, ya ini u Bajop da ong u wym pu em jied. Tangwa u Bajop da ong u wa nyngkong daw sdang u wow lai chwa cha ki paidbah chwa wow chim yei rai, wei burom u yei rai ki paidbah, “Hao hanlada em i thmu wow yakhun, tangwa lada ki paidbah rai ki wa i por ym pu toh ya nga wow yaleh, ymphær wow chong chwa leh,” deiwa pynrap wow kreh chwa u neibynta ka Party.
Hawa kyruiñ won cha ka TMC, u Bajop Pyngrope, da ong u wa i chem wa i yoo yong oo, ka All India Trinamool Congress næ kawa tip tbian ya ka kam ka TMC hapoh i yahkhmat ka Mamata Banerjee, ka Montri Rangbah ka jylla West Bengal, wow kylla man ka seiñ saiñ pyrthai næ ka Party ka wow yahkhmat bha ya ka thaaiñ mihsngi yong ka ri India, ye ko leh wow yahkhmat ya ka Liang Pyrchah wa khlan næ kattæ ka United Opposition deiwa man Montri Rangbah yong ka Mamata Baneerjee.
Chooh chooh u Bajop da ong u wa hei yoo yong oo, i naam yong ka TMC toh hapoh i synchaar yong ka, ym pu jooh chem næ yoo wa em itæ i joo um snaam wa yaphær niam næ jaitbru, ym em i chah yoohbeiñ næ ban beiñ næ lehbeiñ ya kawon kawan ka niam, kynhun næ ya ki khian paaid.
Da ong u leh wa ka TMC toh ka seiñ saiñ pyrthai kawa yaar kawa man ka Secular Party wei ki Scheme kiwa da pynkrehkaam hapoh ka jylla West Bengal toh kiwa da bna naam, wot hadooh wa neiliang ka seiñ BJP da yaleh ko katwa ye yow beiñ wei wow jop ya ka TMC ha ka Election MLA ha West Bengal, tangwa ym ye ko wow leh yeini.
Da kdaw u leh wa i chna næ pynmih ya ki Scheme pynroi, iwa da pynman ya u Bajop wow e naam u ya ka Mamata Banerjee kam ka ‘Iron Lady’ yong ka ri India, neibhah wa ka da ye sakhiat ko wow yieñ khlem khih wei ymphær wot hadien wa ka sorkar BJP da nioñ borbah bha ko ya ka deiwa pynemkaam nadooh ki Enforcement Directorate, Intelligence Bureau, Para Military tangwa ka BJP ym ye ko wow jop ya ka Mamata Banerjee.
Hawa kut u Bajop da sñiaw u wow ong wa lada ki paidbah toh kiwa stat, ka TMC katni toh ka Party ka wow yahkhmat ka wow ap yei eh i khoo yong u duk u suk u rangli u juki.
