Kiwa yahkhmat ka San Chnong Development Organisation, West Jaiñtia Hills District, wa kynthup ya ka chnong Barato, Mukroh, Saba, Maitdien wa Jonkynshur ynne ka sngi da kyntu ki ya ka sorkar jylla wow tuklar smat hajrong i thmu wow baam thaw da ka Karbi Anglong Block I, Assam. Kani ka kynhun wa yahkhmat da kiwa yahkhmat ki chnong deiwa synraan u MLA ka Mowkaiaw, u Nujorki Sungoh da e ki leh da ka dorkhat ha u Montri Rangbah ka jylla, u Conrad Kongal Sangma.
U Nujorki da ong u wa neiliang kiwa chong chnong yong ka thaaiñ da pynsñiaw ko yei pyrchah wa joor yei thmu yong ka sorkar wow booh ya ka Police Outpost ha ka chnong Saba, deiwa ong leh wa ka sorkar Assam ym em burom ko ya ka Status Quo wa da ya soi wym leh ya kiwon kiwon ki kaam ha khappood khamtam wow booh ya ka Outpost.
Da pyntip u wa neiliang u Montri Rangbah ka jylla da kular u wow chimkhia ya kani ka kaam, wei da pyntip u leh wa da dep yaklam wa u Montri Rangbah ka Assam, heiwa u Conrad da pynthikna u leh ya ka San Chnong Development Organisation wa ya ka Outpost wa da sdang wow chna da ka Assam u phah pynsangeh noh chisyndon.
Uwi na kiwa yahkhmat ki San Chnong, u D. Suchiang da ong u wa i em katai ka Outpost ha Saba daw wanrah ko yei eh ya kiwa chong chnong ka thaaiñ, nei chah pyndik ha ki pulit Assam, neibhah ki paidbah hap ki wow lai cha ki bri wa ki lyngkha.
Deiwa ong leh wa hanla u Conrad da kular u wow leh yeiwa emkaam tangwa khuslai wa boi ini toh du i ktien donhi katwa i kaam won duna i iwa da jooh chem ki kam kiwa chong wa sah cha khappood.
Kani ka Police Outpost ha Saba toh kawa da wan wow wai ya ka ha ka 12-06-21 deiwa emlang u MLA ka Karbi Anglong Block heiwa chwa ya ini, ki San Chnong da dep ujor ki ha u DC ka West Jaiñtia Hills ha ka 27-04-21 yow phah pynsangeh yei chna tangwa ym em leh iyi iyi leh.
