Shillong: Neiliang ka CoMSO ynne ka sngi da e dorkhat ko ha kamra krehkaam u montri rangbah ka jylla wa waroh ki montri ka sorkar hajrong i pynkylla ya ka Sixth Schedule ka Constitution.
Ka mat wa kongsan toh wa neiliang ka CoMSO da dawa ko wow pynkylla ko ya ka Paragraph 12A(b) wa ka Paragraph 20 yong ka Sixth Schedule.
Ka CoMSO da ong ko wa nadooh wa pynman ya ka jylla Meghalaya ka bor wow pyllait næ kyntait næ pynbait ya ki aiñ ka Parliament ha ka jylla da ekti noh ha u President katwa nachwa ha ka Sixth Schedule wa nyngkong em ko ha u Governor wei hadooh katni ka bor em ko ha u Lat ka jylla Assam.
Ka sorkar jylla da kyntu ko ya u President ka India wow pyllait (Exempt) ya ka Conservation of Forest Act wa ya ka Mine and Mineral (Development & Regulation) Act ha ki por wa da dep, tangwa u President da kyntait u ya ki. Kamtæ da kyntu wow uiñ biang kani ka Bill ha u lat kamwa man ha ka Sixth Schedule warim khnang wa ka jylla u ye ko wow yada pyn daka hi na i pynkrehkaam ya ki aiñ ka Parliament khamtam kiwa ktah ya ka riti dustur, i man kyrpang, ka khyndaw ka chyiap, ki marpoh khyndaw, ki khloo, i psiah ki baar ri wa kiwi kiwi.
Ka CoMSO da ong ko leh wa i long i man ka sorkar pyrdi ha kini ki por hapoh i yahkhmat ka BJP man i iwa khuslai ya ki jylla khian paaid khamtam nei thmu wow wanrah ya ki aiñ kam ka CAB, ka Uniform Civil Code, ka Central Anti Conversion Law, i khang baam doh masi, i phah puræ hindi wa kiwi kiwi.
Kamtæ da emkaam ya ki bor synchaar hi wow yada wei wow ye u kyntait ya ki aiñ ka Parliament wow em ha u lat uwa haap e yumut ha ka sorkar jylla wa ka dorbar chna aiñ ka jylla.
I dawa pynkylla ya ka Paragraph 20 toh wow pynhaap biang ya ka Municipal Area næ ki Normal Shillong Area ha ka KHADC khnang wow bait i synchaar tre ri.
Ka CoMSO da dawa ko leh wow khang ya ki Unrepresented Tribe wow chah thung MDC wa ya ki Dorbar Chnong ymtoh wow pynkylla dur deiwa wanrah ya kitæ ki Village Council wa ki Municipal Council.
Da pdiang ko leh ya i thmu wow e yarap poisa (Fund) cha ki Distict Council wa ki Dorbar Tre Ri lyngba ka Article 280 wei da kyntu wow pynman yeini lyngba ka Article 275 kamjooh leh i pynkrehkaam ya ka Anti Defection Law, wow khang u ksoh ar kreh, wa kiwi kiwi.
Discussion about this post