theme-sticky-logo-alt
theme-logo-alt
Advertisement ad1
Advertisement ad1

E dorkhat ka UDP ha u Amit Shah yow dawa pynkrehkaam ILP

Advertisement ad1
Advertisement ad1

Ka United Democratic Party kam kawi na kiwa emlang hapoh ka Meghalaya Democratic Alliance da e dorkhat ko ha u Union Home Minister, u Amit Shah ha ini i wan u cha Shillong ar sngi kawa da ekti ha u Shah da MLA ka UDP uwa man leh kam u Minister In-charge Home (Police) u Lahkmen Rymbui ha Conventional Hall, Pinewood Shillong.

Ka dorkhat ka UDP da ong ko wa ka jylla daw lehkmen ko yei dap 50 snem kam ka jylla ha ka 21 Duiyatra 2022, wei kam ka Party da yaleh wow pynlai ya ka jylla chakhmat wei em leh boon ki moochynthut ya ka jylla kamtæ emkaam wow booh ya ka luti wow lai neibynta ki 50 snem wow wan.

Advertisement ad1

Ka UDP da kyntu ko ya u Shah wow pyrkhat yei pynkrehkaam ya ka Inner Line Permit (ILP) hapoh Meghalaya, iwa man leh i jooh kamwa da leh neibynta kiwi ki jylla ka thaaiñ kam ha Nagaland, Mizoram, Arunachal Pradesh wei ini wadep da e leh ya ka jylla Manipur.

I psiah pyrchah ya ka aiñ toh iwa chon khia ya ki tre ri ka thaaiñ mihsngi wei da toh por wow pyrkhat ya ini da iwi i rukom pyrkhat heithaw da iwa piah heiwa ki 60 MLA ka Meghalaya leh da dep chim ki da i rai namo ka Resolution ha ka 19-12-20 yow dawa ya ka ILP, da ong ka UDP.

Da khana leh ha u Shah yei angnood wow pynpsiah ya i ktien Khasi wa Garo hapoh ka Eight Schedule ka Constitution ka India, heiwa yeini leh da chim yei rai da ka Meghalaya Legislative Assembly ha ka 26-09-18.

Da kdaw leh yei pynman aiñ ya ka Meghalaya Language Bill ha u 2005 yow tipmit ya ka ktien Khasi wa Garo kam ki Associate Official Languages, heiwa kini ki ar ktein da biang ki kyndon wow tipmit ya ki deiwa em boon ki bru wa klam ya ki wa ki thaw wa em kini ki jaitbru, wei da tipmit leh hadooh ka puræ Graduate da ka Dibrugarh University ha u 1919 wei katni da ka Calcutta University, Guwahati University wei da man ko leh kam ka ktien e sikai nadooh ki kyrdan Primary hadooh Ph.D hapoh ka North Eastern Hill University, kamjooh leh da em boon ki kot wa da thoh ha kini ki ktien.

Heiyatoh wa u pood da pynsñiaw yei sñiawkmen wa ka sorkar pyrdi da chimkhia ko ya ini i kaam iwa da sahkut la 48 snem. Deiwa pyntip ya u Shah wa na i por cha i por da mih i ya kynaad hanla da chim ya ka rai wow pynneh ya ka Status Quo. Kamtæ da yooluti wa daw man ini iwa jop yow ye noh u pynbait ya u pood hapyrdi ki ar jylla.

Heiyatoh wa i pynkylla ya ka Sixth Schedule, da ong wa iwa da tyrwa da ka Parliamentary Standing Committee heiyatoh waka dustur riti ki tre chnong toh u thap lang ki yow pynman ko leh yei lai ryntih i krehkaam ki District Council ka jylla.

Hajrong won ka Meghalaya-Assam Joint Cadre System, da ong wa em ki myntoi wei em i dooh myntoi, wei da ktah ko leh yei rukom krehkaam ka sorkar hapoh ka jylla heiwa da em ki sahep sorkar wa da yut biang cha ka jylla wa wan ki. Kamtæ ka UDP da ong ko wa da toh u em jar jiar ki bhah (Cadre) neibynta ka Meghalaya kiwa da booh wow kreh neibynta yong ka.

Kamtæ ka UDP da kyntu joor ko ya u Amit Shah wow chimkhia u ya kini ki kaam.

Share this:
Previous

Khih biang i dawa ILP hadien wym klam che u Amit Shah

Next

Kynmoo warom ka ri ya ka lyngkhooh snem wa jop ya ka thma Kargil