Ka seiñ Jaiñtia National Council da thoh ko wow ujor chadooh ka Ministry of Road Transport and Highway (MoRTH) ka sorkar India heiyatoh wa i sih u sarok NH-6 cha palat pood deiwa ong wa ini waroh toh deiwa kheiñstiñ ka NHAI wow pynchna ya uni u sarok iwa da ktah hadooh kattæ kattæ ya ki paidbah nadooh ki heh ki khian wei khamtam ya ki khynnah skur wa lai wa wan na uni u sarok.
Ha ka 11 tarik uni u bnai da yoh yei jubab naka MoRTH lyngba u Sunil Prakash Bhardwaj (CGM HR Admn Coord) uwa da pynche ya ini waroh heiwa da ong u wa da pyntip cha oo wa neidaw wa joor u slap ynnin u snem, da wanrah yei oor khyndaw ha kiwa boon ki thaw iwa da ktah bha ya u sarok wei da chem chitom leh u pynchna yeiwa sih neidaw hiar ma hiar u slap, deiwa ong u wa chwa u hiar u slap ha uni u snem da dep pynchna ya u sarok yow hoi u lai ki kari.
Da ong won u leh wa ha uni u snem da joor biang u slap iwa da wanrah biang yei oor khyndaw wei da sih kiwa boon ki bynta uni u sarok khamtam na Sonapur cha Ratacherra wei da pyndap mooria hanla joor u slap. Chooh chooh da ong u wa u siang psiang ym toh iwa man wei daw leh yeini mar ya kut noh i por slap.
Da pynkynmoo u leh wa yei pynchna ya uni u sarok da leh dei langær da ka NHAI tangwa em ki thaw wa sih u sarok neidaw wa em ki thaw sait kari, i yoo kulmar i rukom pynlai ya ki Pipe um, i em ki kari wa kit palatpood i khia, i chna ya ki sarok chnong khlem da biang ki dooid, da em leh i pynjrong yei khyndaw palat ya u sarok hawa chna yung ki bru deiwa khlem booh dooid wei nadooh na Khliehriat hadooh ha Ratacherra da em boon kiwa tih khyndaw, kiwa tih mar pohkhyndaw ha ki thaw samen ki bru khlem da yoh bor iwa da pynsih ya u sarok.
Hanla kattæ leh da ong u wa ka NHAI da dep thung Contractor wa thymme da ka M/s SL Infra nadooh ka 29-09-23 yow pynchna ya u sarok nadooh na Sonapur (Kilometer 141+500) chadooh cha Ratacherra (Kilometer 171.455). Da thung leh sa kawi ka Contractor da ka M/s M R Construction kiwa da booh yow pynchna ya u sarok nadooh Kilometer 69.200 (Jowai) chadoooh Kilometer 141.500 (Sonapur).
Da khana u leh wa da em i tyrwa yow chna pynkhlan pynchkeh ya u sarok nadooh na Jowai cha Ratacherra uwa jrong 102.255 Kilometer wei da jan yoh bor wow leh yeini neidaw wa uni u sarok man u uwa emkaam bha deiwa pyrkhat yeiwa chakhmat kamjooh yei chngaaiñ ki paidbah.
Da pynkut u deiwa ong wa ka yung krehkaam yong oo da pyrchang ko katwa ye deilang wa ki Contractor yow pynman ya uni u sarok uwa biang u pynemkaam ki kari deiwa pynchna ya waroh iwa sih uni u sarok NH-06 nadooh na Jowai chadooh cha Ratacherra.
Neiliang ka seiñ da ong ko wa daw booddien ko yeini waroh.
Discussion about this post