Ki 8 ngut ki MLA ka UDP da yachem ki wa u Union Home Minister, u Amit Shah yow yaklam heiyatoh wa kiwa boon ki mat nadooh i sñiawkhia yei tyrwa pynkylla ya ka aiñ FCRA neitæ ki dawa wa dang sahteiñ nadooh i pynkrehkaam ya ka ILP, MRSSA, i tipmit ya ka ktien Khasi wa Garo, ki kaam wa yatoh wa u Uranium, i kyrriah ya ki Harijan na Them Iewmawlong wei yow tipmit ya ki niam tynre.
Niliang u MLA ka UDP uwa man leh kam u Montri sorkar, u Lahkmen Rymbui da pyntip u wa u Amit Shah da kular u wa i tyrwa pynkylla – FCRA (Amendment) 2026 daw chong bichaar chwa ki da ka Joint Parliamentary Committee (JPC), deiwa pyrkhat yeiwa ye u chah ktah ka Meghalaya.
Heiyatoh wa ka MRSSA 2016, u Amit Shah da ong u wa ka sorkar Meghalaya daw hap ko wow pait deiwi yeiwa da pynkylla ko hapoh kani ka aiñ chwa wa ka sorkar pyrdi u chong pyrkhat ko yeini.
Heiyayoh wa ka ILP, u Amit Shah da ong u wa ka sorkar pyrdi dang bichaar ko yeini i dawa tangwa hap pyrkhat leh wa ka Meghalaya toh ka jylla wa hap kiwi wow lai luti na ka.
Neibynta won wow pynkylla ya ka aiñ MMDR Act, 1957 yow ye u tih mooyong hapoh ka jylla. U Amit Shah da ong u wa da em ka Committee wow pait yeini wei ka sorkar pyrdi kwah ko wow e kyrchaan ymtoh wow pynkhia ya ki paidbah.
Heiyatoh wa ka ktien Khasi wa Garo, u Amit Shah da kular u wa dang pait yeini i dawa.
Ki MLA ka UDP da yaklam ki leh heiyatoh wow kyrriah noh ya ki Harijan deiwa e thaw ya ki.
Da kyntu leh ya u Home Minister wow tipmit ya ka Niam Khasi wa Niamtre kam ki niaam khian paaid.
Kiwi de ki dawa kynthup ki wow booh bhah 38 tylli ki Eklavya Model Residential School, i chna sa ya uwi u National Highway ha ki bynta khappood India-Bangladesh, u kyrchaan poisa ya ka NEHU wei wow sangeh ya iwon iwon i thmu tih Uranium ha Meghalaya neidaw wa pyrchah ki paidbah.
Discussion about this post