15 49.0138 8.38624 1 0 4000 1 https://wyrta.com 300 0

E ka Hima Mylliem soo tylli ki pata wow chna yungmane wa ka skur ha Them Iewmawlong

0 Comments

Shillong: I dawa wow kyrriah ya ka Sweeper Colony da pynman ko ya ka Hima Mylliem wow pynlang ya ki kot ki sla kiwa yatoh wa i rukom e pata ya ka thaw wa em ha them Iewmawlong.

Hawa yaklam wa kiwa pathai khubor ynne ka sngi u Acting Syiem ka Hima Mylliem, u Pa’iem Ricky Nelson Syiem da ong u wa ka Hima ka sñiawkhia ko yei long i man yong ka suk ka saiñ ha nongbah Shillong ha kini ki 5 sngi wa dadep kawa da mih i dawa wow sai noh ya ki khar mator na them Iewmawlong kawa man leh ka thaw ka Hima Mylliem.

Advertisement ad1

U Syiem da pyntip wa ha ka 2 tarik uni u bnai da khut u ya ka yalang yong ka Executive Durbar wow pait ya ki kot ki sla kiwa yatoh wa kani ka thaw, wei da ong u wa hadien wa da pait bniah ya ki kot ki sla da chem wa ya katai ka thaw da e cha ka Municipal ha ki ar bynta lyngba ka soskular (Agreement) wa da yasoi ha u snem 1954.

Da ong u wa ha katai ka por ka Hima da e ko ya kini ki thaw cha ka tnat Municipal neibynta wow sah ki wakreh kani ka tnat wei sa kawi toh neibynta wow chna ya ka yaaw ka wow pait da ka Municipal wei i heh yong kani ki thaw man ki 11,000 sq.ft wa sa kawi won man ko kamwa 21,000 sq.ft.

U Syiem da kyntait u leh wa kani ka toh ka yong ka Kur Nongkhlaw waka Kurkalang neibhah katkam i thoh i taar wa ka Hima da yoh, kani ka thaw toh ka yong ka Hima wei ha i por wa yasoi ya ka soskular ha u snem 1954, ym em kini ki ar kur.

U Syiem ka Hima Mylliem da ong u leh wa ya kani ka thaw ha them Iewmawlong ymtoh kawa da e dooh cha ka Municipal, wei i e cha ka Municipal toh katwa kani ka tnat ka dang pynemkaam ko ya kani ka thaw wei lada ym pynemkaam de ya ka daw haap biang ko hapoh i pynlai ka Hima Mylliem.

Ha iwi tawon i liang da pyntip wa ki pata leh ha kani ka thaw da e ha u snem 2009 da u Pa’iem Latho Manik Syiem neibynta ki soo tylli wow chna wa kynthup ya ka Gurdwara, ka Shiva Mandir, ka Durga Mandir wa ka Gurunanak School, tangwa ha u snem 2010 da pynsangeh noh ya kani ka pata da ka Hima Mylliem hadien wa pyrchah ki seiñbhalang wei kini ki bru ka da yaleh noh ki da ka mukotduma.

Hadien ini ya yungbichaar da pynmih hukum ko ha u snem 2011 wa ya kani ka kaam da phah biang cha Hima wow chim ya ka rai, wei wow e leh ya ki daw wow pynsangeh noh ya ka pata neibynta wow chna ya ka Gurdwara, ka Shiva Mandir, ka Durga Mandir wa ka Gurunanak School wei wow khut leh ya ki yow pynsñiaw ya i daw, tangwa hadooh katni leh ym em da leh ya ini.

U Syiem da pynyip u leh wa hadooh katni em 218 tylli ki manyung kiwa da paan pata na ka Hima, tangwa neiliang u Syiem wa ka durbar ym em e ki.

0 Comments

Leave a Reply