U Montri wa pait ya ki Kaam Pohyung ka jylla, u Lahkmen Rymbui da e khublei u ya ki dorbar chnong wa ki khynhun kiwa da ya krehlang wa ka sorkar wow yoh biang ya ki suloi yong ki pulit kiwa da chah knieh noh ha ka 15 tarik uni u bnai.
U Montri da pynsñiaw u leh yei kyrmen wa skem wa i yakrehlang yong ki dorbar chnong wa ka sorkar u pteiñ i neibynta u pynneh ya i suk i saaiñ ha ka jylla. Ha iwi i liang u Rymbui da ong u wa kamwa man katni i long i man yong i suk i saaiñ ha ka jylla da wan biang i wei da kyntu u ya waroh ki kynhun wa kiwa yahkhmat wa kynthup na ki dorbar chnong wow pteiñ ki u ya krehlang.
Ki pulit ka East Khasi Hills wa ki Special Rescue Team ynne ka sngi da yoh biang ki ya 3 tylli ki suloi wa da chah knieh ha ki bru wym tipmit ha ka 15 tarik uni u bnai na Mawkynroh, ki pulit da chem biang ki ya kini ki tiar siat na Wahumkhrah marjan wa ka yingkieñ wa pynyabi ya ka Jaiaw Umpohliew wa ka Mawlai.
