theme-sticky-logo-alt
theme-logo-alt

E kti ka Riat Laban Dorbar Pyllun yei thaw pynyieñ yaka Shillong Peak Ropeway

Ka sorkar Meghalaya hadien wa da pynban ko ini wa dep wow chna da ka Ropeway yow kit ya kiwa uiñke suwari cha Shillong Peak View Point, ynne deiwa ya krehlang waka chnat Tourism da e kti yei thaw da ka Dorbar Shnong Riat Laban Dorbar Pyllun yow pynyieñ ya kani ka Ropeway.

I thaw wow ku ya kani ka Ropeway wa tip leh kam ka Lower Terminal toh kawa em ha Forest Nursery Riat Laban katwa i thaw hiar namo ka Upper Terminal toh kawa ha Shillong Viewpoint. Wei kani da man ko leh ka Ropeway kawa nyngkong hapoh ka jylla Meghalaya.

Ha kani ka sngi da emlang leh u Montri Rangbah ka jylla, u Conrad K Sangma wow sakhi yeini i e kti yei thaw ha ka yalang wa da pynman ha Shillong Peak.

Kani ka Ropeway u chna hei thaw wa heh 1.34 Hectare hei lut wa T. 138 klur. Ya ka Lower Terminal Point (LTP), u booh ha Forest Nursery Riat Laban ha i thaw wa heh 11146.96 sq.m iwa jrong 838 mtr na sla duriaw heiwa daw emlang ka Station Building, Concourse, Maintenance Room, Ticket Room cum Office, Store Room, Security Room, Waiting Area, ki thaw baam, ki paikhana wa ki thaw pynyieñ kari.

Ya ka Upper Terminal Point (UTP) u chna hei thaw wa heh 2025 sq.m iwa em 1633 mtr na sla duriaw wei daw em ka Station Building, Concourse, Ticket Room cum Office, Maintenance Room, Waiting Area, Food Court, Cabin Parking wa kiwi kiwi de.

Najrong kini ki Terminal Point, daw em 9 tylli ki Tower kiwa daw chna hei thaw wa heh 251.17 sq.m.

Kani ka Ropeway toh kawa da tip kam ka Monocable Detachable System heiwa ka thaw chong toh kawa dei kset sbak (Gondola) kawa em ki dwar wa pna wai hi namo Automatic Doors. U chna leh ya kani ka Ropeway heitæ i rukom wow chynna bha ki bru ya ka sor Shillong heipor wa ku kamjooh heipor wa hiar.

Neiliang u Montri Rangbah da ong u wa ki kaam uiñke suwari toh kiwa emkaam bha yow pynku yei yoh i laa ki bru wa em cha palatsor. Deiwa pyntip leh wa da sdang ya ki Homestay Scheme heiwa da dep chna 2500 tylli ki Homestay ha kylleiñ ka jylla. Da e sikai leh ya ki bru kammon wow pdiang ya kiwa uiñke suwari kamjooh kitu kiwa seiñ khih ha kani ka jait kaam.

Najrong kini da ong u wa da yoh wow wai ya ar tylli ki 5 Star Hotel ha Shillong wei da sdang leh ya ka Luxury Vehicle Scheme yow kit ya kiwa uiñke suwari da ki kari wa syad dor. Kamtæ kini waroh da pynmih ki ya kiwa boon ki kreh ha ki thaw wa em cha sor wa cha palatsor ka Meghalaya kawa da man leh katni kam ka thaw uiñke suwari wa kyrpang bha.

Kamtæ da ong u wa kani ka Ropeway man ko kam kawi na kini ki luti wow e ya kiwa uiñke suwari wow maad ki da iwa rap phær wei da e khublei u ya ka Riat Laban Dorbar Pyllun kawa da pynyoo yei chaniah wow e kti yei thaw yow kreh ka sorkar ya kani ka Ropeway.

Share this:
Previous

Da wai ya ka Engineering College wa nyngkong dooh ha Meghalaya

Next

Phah wan ka Khimusniang ya kiwa kær sainar chieh ha rood ka wah Myntdu