U Montri Rangbah ka jylla, u Conrad Sangma da e dorkhat u ha u Montri ka sorkar pyrdi wa pait ya ka Agriculture & Farmers Welfare uwa man leh u President ka ICAR Society, u Narendra Singh Tomar wow thooh luti wow yoh ki khynnah na Meghalaya kiwa dang puræ 4th Year ka BSc. Agriculture ha CAU, Imphal wow pyndep ki yei puræ puthi.
U Conrad Sangma da e u ya ka dorkhat ha u Narendra Singh Tomar ha nongbah New Delhi ynnin ka sngi.
Ha ka dorkhat da kyrpaad ya u Tomar wow pynbiang ki laad ki luti ya ki khynnah 4th Year BSc wow ye ki u pyndep ya ka Rural Agriculture Work Experience (RAWE) Programme ha Meghalaya. Da kyrpaad u wow e laad ya ki khynnah wow yaleh noh ki ya ka RAWE hapoh ka CAU wa em ha Kyrdemkulai, kawa man ka College ka CAU Imphal hi.
U Conrad Samgma da kyntu u leh ya u Tomar wow kyrriah ya waroh ki khynnah ka Meghalaya kiwa puræ ha CAU Imphal cha ka CAU Campus ha Kyrdemkulai hadooh wa poi i chongsuk ha Manipur yow ye ki wow pyndep yei puræ khlem thut.
Chooh chooh u Conrad da e khublei u ya u Tomar yei krehkaam ka Ministry of Agriculture and Farmer’s Welfare.
Da khana u leh wa kammon ka sorkar jylla wa ka sorkar India deiwa ya krehlang da ye ki wow wanrah biang ya ki khynnah ka jylla na Manipur heipor wa em i awri ha. Ym du ki khynnah na Meghalaya kiwa da ye wow liwan suk cha ka jylla tangwa wot na kiwi ki jylla leh kamjooh.
Ye leh u ong heini wa kamwa 80% na kiwa chong chnong ka jylla toh kiwa imja na ki kaam rep wei emkaam bha ya kini ki khynnah wow pyndep ki yei puræ puthi.
Discussion about this post