Ka seiñ Garo Students’ Union (GSU) da pynsñiaw ko yei pyrchah ya iwon iwon i thmu wow pynkylla ya ka Meghalaya Job Reservation Policy, 1972 deiwa ong wa iwa mih i yatai yania katni toh neidaw wa pynkrehkaam ya ka Roster System wa i rukom kheiñ ya ka lada u sdang nadooh u 1972 lane neini chakhmat.
Hajrong ini da ong wa bha hi u yaklam kammon u pynkrehkaam ya ka Roster System tangwa ymtoh won u pyntlot ko yei rukom krehkaam ka Reservation Policy wei kam ka seiñ yaroh ko yei pynkrehkaam ya ka Roster System.
Ka seiñ da ong ko wa hap wow pdiang wa ki Garo kamjooh kiwi ki jaitbru wa em ha Garo Hills ym em yoh ki yei puræ puthi wa biang kamjooh leh ym biang ki thaw puræ neibhah wot ka Engineering College wa Medical College leh toh kiwa da sahkut khlem pyndep chna kamjooh leh ki Model School wa ki College.
Kamtæ da ong wa ini da ktah bha ko yei ye ki bru ka Garo Hills wow ye u yaleh wa kiwi ki payu para ka jylla wei da pynkrehkaam ya ka Meghalaya Reservation Policy, 1972 yow pyntikna wa yoh bhah lang wei yow yoh myntoi kitu kiwa duna bor ha ka imlang sahlang.
Ka seiñ da yaroh ko ya ka sorkar Meghalaya kawa bien wow pyrkhat ya ini i tlot ki Garo kamjooh kiwi ki jaitbru ri-loom kiwa da dooh bynta da i rukom thung kreh wei ka seiñ pdiang ko yei phah ka High Court ka Meghalaya wow pynkrehkaam da ka Roster System yow man ka Reservation Policy kamwa da thmu.
Ka seiñ da kdaw ko wa katkam ka Clause No. 1.2 ka Reservation Policy, 1972 da ong wa kiwon kiwon kiwa ym ye u pyndap ha uwon uwon u snem neidaw wym em bru wa biang toh u rah won cha u snem wow wan tangwa hadien ar snem lada ym pyndap daw kheiñ toh kawa da yap ka bhah. Kamtæ ka seiñ da ong ko wa neidaw wym em ka Roster System kini ki kyndon da chah tyngkheiñ ki.
Chooh chooh da ong wa ha u 2007, ka GSU da chem ko ya ini i duna i rukom thung kreh neidaw wym em ka Roster System heiwa da em hadooh 500 tylli ki kreh kiwa dang sah wa toh u yoh ki Garo katkam wa kheiñ ka seiñ ha wah haneiñ. Wei u pyndap ya ini iwa dang sah da man ko iwa eh bha wei ini pynyoo ko wa em hok wow em ka Roster System neibhah boon ki bru ka Garo da dooh ki yei hok yong ki.
Ka GSU da ong ko leh wa ym pdiang ko yei ong ka VPP wa ka Reservation Policy hap wow bhah deiwa kheiñ yei boon bru wei u pyrchah ki leh ya ini i e buit ka VPP neibhah hap wow kheiñ ya ka puræ puthi, i biang ki thaw puræ puthi wa kiwi de yow sñiawthooh katwon tkoh ki Garo.
Kamtæ da ong wa e laad chwa u yatoh kyrdan ki Garo wa kiwi deiwa yaklam leh chaphang ka Winter Capital lane wow yoh jar jiar ka jylla lada i hok iwa toh u yoh da pydooh ki neibhah ym em laad ki Garo khlem da em ka Reservation Policy.
