Ka Israel Defense Forces (IDF) ynne da phah wyrta ko cha kiwa chong wa sah ha Gaza wa ha Northern Gaza wa e por ya ki 3 kynta yow pynemkaam ya ka luti wow yut kawa da dep pynkhreh ya ki yow lai ki cha South Gaza.
Ini toh nadooh 10:00 waje i step hadooh 1:00 waje i sngi hei por yong ki.
Ha kini ki 3 kynta ym leh iyi iyi da ki chipai yow e laad ya kiwa chong chnong ka Gaza wow yut ki na ini i thaw.
Ka IDF da ong ko wa i thong wow phah noh da ki chipai toh yow lai pynlait ya kitu kiwa chah ksoh pyrchah yei mon yong ki hapoh ki Tunnel wa em boon bha napoh ka Gaza Strip heiwa da antaad wa kattæ em kamwa 150-200 ngut ki bru wa da rah yabor ki Hamas kiwa da kset hapoh kini ki Tunnel.
Ka IDF ha kini ki sngi wa da dep da siat ko na suiñ ya kiwa boon ki thaw wa ki yung ki sem hadooh ki Mosque wa da suba wa pynemkaam da ka Hamas yow murieh ya ki tiar yaleh thma heiwa ka Israel da dep siat ko palat 100 tylli kam kini ki thaw.
Ini da wanrah i yei yap ki 2,329 ngut ki nong Palestine wei da mynsoo kamwa 9,714 ngut. Ha kini ki 24 kynta hadooh ynne i step ka sngi Bibar da antaad wa da em kamwa 300 ngut kiwa yap wei kamwa 800 ngut kiwa mynsoo ha Gaza.
Ki chipai ka Israel da pynkhreh ki wow psiah myntu cha ka Gaza Strip ha ki bynta wa ksoh da ka Hamas wei yow lait u mynsoo ki bru kiwa da antaad wa em kamwa 10 lak ngut kiwa sah ha North Gaza da kyntu ya ki wow mih na kini ki thaw heiwa ha kini ki sngi wa dep da pynhaap ya ki kot lakdop na suiñ yow pynchlur ya kiwa chong chnong wow mih ki.
Tangwa iwa da jia won kattæ toh wa ki Hamas da khang ki ya kini ki paidbah wa kwah u yut.
Ka Israel da khang ko leh yei psiah ki mar wa emkaam cha Gaza nadooh i baam, ka um wa i bordiñ.
Discussion about this post