Ka Voice of the People Party (VPP) da e por ko ya ka sorkar MDA-II hapoh 48 kynta wow pynmih yei pynbna wa da pynsangeh yei thung kaam ha ki chnat waphær waphær.
Kiwa yahkhmat ka VPP da mih ki ynne ka sngi ryngkat ki paidbah wow synraan ya kiwa yahkhmat wow lai booh ya ka dorkhat hakhmat ka sorkar yow dawa pynsangeh yei thung kaam, kat wym pu ye wow pynbait thymme yei bhah thung kreh lyngba ka Reservation Policy.
Neiliang u President ka VPP, uwa man leh u MLA na Nongkrem, u Ardent Miller Basaiawmoit da ong u wa lada kut ka 48 kynta wei ka sorkar ym pynmih ko yei pynbna, ka Party daw hap ko wow yakhih bait, wei ha kani ka yakhih da yooluti u wa ki paidbah ym bunood ki yei por.
Neidaw won wa u Montri Rangbah wa u Symbood Montri Rangbah ka jylla, u Conrad K Sangma wa u Prestone Tynsong ym em ki ha Shillong, neiliang kiwa yahkhmat ka VPPP da phah ki ya ar ngut kiwa yahkhmat kitæ u Vice President, u Dr. H. Kara Chen wa u General Secretary, u Dr. Ricky AJ Syngkon wow pynpoi ya ka dorkhat cha yung krehkaam u Montri Rangbah.
U Ardent da khrwait u ya u Conrad wa ya u Prestone kiwa da hær cha Delhi, deiwa ong wa ki pyrchang ki wow yait u yachem ya ki MLA ka VPP hajrong kani ka phang. Da ong u wa ym tip wa tieñ ki hadooh katni ya ka VPP.
