Ka Montri wa dang thung thymme ka chnat i chait i khiah ka jylla, ka Dr. M. Ampareen Lyngdoh da ong ko wa iwa hakhmat dooh toh wow pynduna yei khlaad ki manbei wa kha khon kamjooh ki khonboo wa dang kha hapoh ka jylla wei yeini da dep sdang nadooh ka sorkar warim heiwa u Montri Rangbah da wanrah u ya ka MOTHER App kamjooh ki thaw sah ya kiwa daw kha khon kam chibynta wow pynchlur ya kiwa punkhon wow lai kha khon ha ki thaw sumaar.
Da kdaw ko leh ya kiwi ki daw kam i wym biang ki sarok ya kitu kiwa punkhon yow lai kha khon cha ki thaw sumaar wei yeini daw ya krehlang da waroh ki chnat sorkar yow jop ya ini i eh wa maad ki paidbah.
Da pyntip ko leh wa kiwa chong chnong daw embynta ki ha kini ki kaam waroh khamtam neibynta ki ar tayaw wa nyngkong dooh ki khonboo wa dang kha heiwa nadooh ki ASHA wa ka chnong hi waroh kawi daw khut yei ya krehlang ki yow pyntikna wa waroh ki khynnah yoh ki yei kyrchaan yow heh u san ki manda poi ki cha kani ka pyrthai.
Da ong ko leh wa kawi na ki kjut wa khlan bha wow chim yei mynsien bru toh ka Cancer wei daw lai pait ko ya ka thaw sumaar Cancer wei ym du ini tangwa u pyntikna wa waroh kiwa chong chnong yow ki yei sumaar wa bha kamjooh i dor wa duna yow yoh sakhiat ki yeitæ i hok wow im.
Sa iwi da ong ko iwa hap yaleh bha hapoh ka jylla toh ya ka kjut Tuberculosis wei daw hap wow pynlut bha yei por wei bor heiyatoh wa ini.
Kamtæ da ong ko wa ha kini ki 5 snem wa da lai da yoh wow chim yukheiñ ya iwa boon wei da booh ya ki yurim wa biang wei ha kini won ki 5 snem toh yow kreh yow pynbha pynmiat ya ini waroh deiwa lai ha ka luti wa biang wei ym man i iwa suk, hanla kattæ leh da ong ko wa e por ya ka wei hadien 6 bnai daw ye ko wow sñiawthooh rap bniah ya ki chnat wa pait ko nadooh i duna Doctor khamtam ki Specialist.
Kam wow pynkynmoo wa ini wa dep, ki heh ka chnat da yachem ki wa ka Ampareen yow khana ya ka chaphang ki thong wa da poi ki kamjooh iwa dang duna.
