U Zenith Sangma, MLA uwa man leh kam uwa e ktien ka Congress da pynsñiaw u yei sñiawkhia heiyatoh waka kaam poisa poilaiñ ka chnat bordiñ deiwa klam chaphang ka ram wa da mynjur daka sorkar neibynta ka MePGCL deiwa ong wa ka sut toh kawa heh bha kawa daw pynkhia yukit ya kani ka Corporation.
Da ong u wa ha uni u bnai, ka sorkar Meghalaya da mynjur ko yaka ram wa T.1345.72 klur neibynta ka MePGCL kawa em hapoh ka MeECL lyngba ka Atma Nirbhar Bharat Abhiyan Scheme deiwa kylli leh wa lada kani Company daw yoh myntoi ko na kani wei lada ym yoh myntoi kiyi wa yoh myntoi, lait na kiwa e yaka ram neidaw wa ki daw yoh biang ki yaka poisa yong ki deiwa kheiñ yaka sut wa ki Company ka sorkar pyrdi kam ka NEEPCO, NTPC, OTPC daw yoh myntoi ki neibhah daw lait noh ka poisa wa sah ki yong ki.
Kamtæ da ong u wa daw man ko ka yukit wa khia yaka Company neidaw wa heipor wa chim yaka ram toh u pait chwa yaka sut heiwa da man ko 9.5% kawa heh bha heiwa ka MePGCL daw hap ko wow su yaka sut wa palat T. 10 klur chi bnai nadooh ka sngi wa yoh ko yaka ram hadooh wa kut 3 snem, wei hadien 3 snem daw hap ki wow su yaka poisa wa da chim (Principal Amount) deilang waka sut neibynta ka 7 snem.
Ha iwi tawon i liang, u Zenith da ong u wa kattu la chi snem ki kor (Generator) wa em ha Umiam Hydro Electric Power Project kiwa da sih, ym pu em chna ya ki iwa da wanrah yei dooh nong wa palat T. 100 klur, kamtæ da ong u wa hawa yatoh waka Meghalaya, kani ka poisa toh kawa da boon bha kamtæ da kylli u neiyi i daw wa kani ka Company ym em pynchna de ko ya kini ki kor.
