Jowai: Ka Jaintia Eastern College kam chibynta wow pynneh pynsah ya ki tiar put tiar tem tynre kamjooh yei tem i put tynre ha ka East Jaiñtia Hills District, neiliang ka Music & Cultural Committee yong ka College da pynman ko ya ka e sikai wa 4 sngi ya ki khynroo khyllood wa puræ kani ka College kamjooh kiwa wan na ki chnong wa em cha jan.
Ya kani ka e sikai da sdang nadooh kani ka 4 tarik hadooh 7 tarik wa pynman ha Seminar Hall ka College wei da pynlut pynsep da ya ka yungkrehkaam u Deputy Commissioner, East Jaintia Hills District, Khliehriat.
Katkam i ong u Principal ka College u Dr. P. Nongtdu, kani ka esikai ym toh du wow tip chaphang ki tiar tem kamjooh leh wow tip u tem; ka wow wai luti ya kitu wa em i sap wow lai ki cha khmat kam ka laad yoh khih yoh kreh.
U C.B. Mawkon, MCS, ka East Jaintia Hills District uwa man kam u kongsan ha ka 7 tarik ka sngi pynkut ya kani ka e sikai, hei klam yong oo da yaroh u ya ka Music & Cultural Committee yong ka College wa ya ka yungkrehkaam u Deputy Commissioner, Khliehriat kawa chim ya kam kani ka luti wa kyrpang wow pynneh pynsah wei wow kyntu ya ka rukom tem tynre, khamtam wa snaiwthooh ko wa da jan wiar jait kini waroh hapoh ka jylla.
Da ong u leh “Ka tem ka put tynre hapoh ka District wa ka jylla Meghalaya, man sakhiat ko ka wi na ki spah bah ka wow pyntipmit ya ka jaitbru na pyrdi kiwi ki jaitbru hapoh ka ri.”
Kamtæ da kyntu u ya kiwa wan chah sikai kamjooh ya waroh wow chimkhia ki u pynneh pynsah ya kani ka tem ka put tynre.
Da e buit u leh wow pynman da ki yakop tem ya ki tiar tem tynre wei wow pynman chooh chooh ya ki e sikai yow ye u pynneh pynsah ya ini waroh.
Ha kani ka e sikai da em ki bru wa chemphang ha kani ka kam tem kam put tynre kiwa da sikai wow chna kamjooh wow tem ya ka Sitar, Duitara, ka Ksing, ka Bom, ka Ming, ka Chawiang wa kiwi kiwi de ki tiar tem tynre.
Discussion about this post