15 49.0138 8.38624 1 0 4000 1 https://wyrta.com 300 0

Waroh ki party kwah ki wow kreh wow wai biang ya u mooyong: VH Pala

0 Comments
Advertisement ad1

Jowai: U MP ka Shillong u Vincent H. Pala hawa klam ha ka yalang yong ka 13 Chnong Election Committee ynnin da ong u wa waroh ki seiñ saiñ hima kwah ki wow yaleh wow wai noh ya u mooyong uwa da khang ka NGT hadien wa em ka seiñ na Assam kawa ujor wa ktah u ya ki um ki wah.

Kamtæ neiliang ka sorkar Congress ka jylla da yaleh ko wow thooh ya ki laad ki luti khnang wow ye u wai biang ya uni u mar poh-khyndaw.

Hei yatoh wa i mantre ki paidbah ya ki thaw katwa u mooyong yong ka sorkar pyrdi katkam ki aiñ, da ong u wa neiliang ka sorkar Congress ka jylla chirup wa waroh ki seiñ saiñ hima da soi ki ya kawi ka rai wa da phah cha ka sorkar pyrdi wa ong wa neidaw wa ka jylla em ko hapoh ka Sixth Schedule kamtæ u mooyong leh man u u yong ki tre thaw tre ri; wei ini waroh man i iwa sahteiñ ha sorkar pyrdi kawa yahkhmat da ka BJP.

Da ong u wa hei yatoh wa ini emkaam wow pdiang leh da ki san tylli ki tnat sorkar wei na ki san tylli da pdiang ki le tnat wei dang sah sadu ar tylli ki tnat wow e ki ka rai yong ki.

Da e nongmuna wei da pynkynmoo u ya ki paidbah wa ha u snem 1996 ka yungbichaar ka ri da khang ko wow pam dieñ heiwa ha u 1998 da jop ka UDP ha waroh 7 tylli ki constituency na ri-loom Jaiñtia wei hanla kattæ leh ym em u pyllait ya ki dieñ iwa mut wa ymtoh ka sorkar wa khang yeini da khang da ka yungbichaar.

Da pynrap u deiwa ong wa kammon u khang ka sorkar ya u mooyong hawa chiboon ki yung ye ko u chna lyngba ka dan (royalty) wa yoh ko na u mooyong.

Advertisement ad1

0 Comments

Leave a Reply