Shillong: Ka seiñ Hynniewtrep Youth Council (HYC) seiñbei da pynbaad ko wa ka EC ha KHADC wa yahkhmat da u Pynsngain N Syiem kam u CEM da e Trading License khiar ko cha ki baar jylla wei ini i e License da man i iwa joor bha nadooh wa wan ka PDF hei bor synchaar.
Hawa yaklam wa kiwa thoh khubor neiliang u General Secy. ka HYC, u Robertjune Kharjahrin da ong u wa ka seiñ da dep paan RTI ko ha Duyatra (January) uni u snem hei yatoh wa i e Trading License ka KHADC wei lyngba i jubab RTI, ka seiñ da chem ko wa da man i e Trading License cha wa palat kamtæ da thmu ko wow yachem wa u CEM hei yatoh wa ini tangwa hadien wa yang 3 tayaw leh yow yoh yei pynche tangwa hadooh katni leh ym yoh ki u yachem wa oo.
U Robert da pyntip u wa nadooh u snem 2014 hadooh u Naikhynde 2016 da em hadooh 475 ngut ki baar jylla kiwa paan Trading License naka KHADC we da ke License thymme ko hadooh 450 ngut.
Da pyntip u leh wa i yoh dan ka KHADC nadooh u snem 2005 hadooh 2016 toh T. 39,46,51,140 katwa ha u snem 2010-11 ka da yoh ko T. 7 klur, ha u snem 2011-12 heipor wa man CEM u PN Syiem da ku na ka 7 klur cha ka 12 klur, ha u snem 2013-14, heipor wa synchaar ka ARPA da hiar biang cha 11 klur, wei manda wan biang ka PDF ha u snem 2015-16 da ku biang na ka 11 klur cha ka 19 klur, kawa pynyoo che wa heipor wa synchaar ka PDF da joor bha ka e License cha ki baar jylla.
Da ong u leh wa lada i mih na ka kam khayi ym em mut ko wa da kyrkhu ya ki jait bru ini mut wa kat dang slem dang boon ki baar jylla kawa wanrah yei eh won ya ki tre ri.
Da ong u leh wa lada kam ki tre ri dooh i ya ka khayi pateiñ mut i waka jaitbru da yap chwa ko. Kamtæ da kyntu ya ka EC hapoh i yah khmat u Pynshngaiñ wow leh smat yeiwa emkaam wei lada ym leh iyi iyi daw pynman da ka yakhih iwa da rai ka General Executive Council ka seiñ.
Discussion about this post