U Montri Rangbah ka jylla, u Conrad K. Sangma ynnin ka sngi da pynman u ya ka yalang yow pait yei long i man i chlai um ha Ri-loom Garo.
Ya ka yalang wa pynman ha Tura, da wan wow chimbynta da u DC, SP wa ki sahep sorkar kiwa na ki le tylli ki District wa chah ktah dooh, kitæ ka West Garo Hills, South West Garo Hills wa South Garo Hills District.
Ha kani ka yalang da khana cha u Montri Rangbah yei yarap wa da de cha kini ki thaw wa da chah ktah wei kiwa boon ki thaw toh ki wym em de chah ktah neidaw wa da ran ka um.
Da pyntip leh wa da em ki sarok kiwa da sih, ki yung ki sem leh, ki thaw rep kiwa da chah ktah ha kini ki le District.
Neiliang u Montri Rangbah da phah u ya waroh ki sahep wow chimkhia yeini wei wow pyntikna wa waroh iwa emkaam u poi smat i cha ki bru wa toh u yoh yarap kamjooh wow pynchna smat ya ka bordiñ kamjooh ki sarok kiwa da chah ktah nei oor khyndaw wa u slap.
Da ong u leh wa ini i chlai um ha kini ki por ha ki thaw wa man madan ka West wa South West Garo Hills toh iwa jooh jia kamtæ da em emkaam wow booh ya ki thaw yow ye u man kam ka thaw rieh (Permanent Relief Camp) ya ki bru heipor wa em biang i chlai um deiwa chna da ki Pre-Fabricated.
U Montri Rangbah da ong u wa ha kiwi won ki por ya kini ki yung ye wow pynemkaam neibynta kiwi won ki kaam.
U Montri Rangbah da lai u leh cha ka Tura Civil Hospital wei da e u ya ka poisa yarap cha uwa ha yung ki le ngut kiwa chi yung kiwa dooh yei mynsien ki hei oor khyndaw ha Gambegre, West Garo Hills District.
