Ynne ka 2 tarik, ki arngut ki MDC ka NPP kiwa kynthup ya u Thombor Shiwat, CEM, JHADC wa u Jesse Suiam, Chairman Public Grievances Committee, JHADC, hajrong i kitkhlieh wa sñiawkhia hajrong ka yap ka im yong ka jylla waroh kawi khamtam yong ki artylli ki District hapoh ri-loom Jaiñtia na i daw wa ktah yong ka khlam COVID-19 da e sñiawbha ki ha u Deputy Commissioner yong ka West Jaiñtia Hills District T. 50,000 cha ka Chief Minister COVID-19 Relief Fund.
U Chief Executive Member yong ka JHADC u Thombor Shiwat da ong u wa hadien wa mih khubor lyngba u Montri ka chait ka khiah yong ka Assam wa da em 19 ngut kiwa da chah ktah ha uni u khñiang COVID-19 hapoh ka jylla Assam, wa da toh i por wa ka sorkar jylla Meghalaya wow pynkhreh wow thooh ki laad yada wa kani ka khlam ym psiah ki cha ka jylla yong ngi.
U Chairman ka Public Grievances Committee, JHADC, u Jesse Suiam uwa man u MDC yong ka 6-Ummulong-Moodymmai Constituency hadien wa e yarap poisa cha ka Chief Minister Relief Fund, da e u da i thoh cha u Deputy Commissioner yong ka West Jaiñtia Hills District, wow kyrpaad ya ka District Administration kamjooh leh ya ka sorkar jylla deiwa e yumut wow pynrkhiñ yei khynra ha ki thaw psiah thaw mih yong ka District waka jylla.
Da kyrpaad u leh ya kiwa chong chnong ka 6-Ummulong-Moodymmai Constituency wow man kiwa syndong wei wow ya krehlang wa ki phang yong ka sorkar jylla khnang wow ye u pyndooh pyndam ya kani ka khlam kawa da ktah yaka pyrthai waroh kawi.
Discussion about this post