Ha kini ki por wa em ka khlam COVID-19, ka sorkar da chaniah tylli ko ha ki wakreh ha i chait i khiah khamtam ki ASHA namo ki Accredited Social Health Activists wow yarap ha i yakhun ya ka khlam ha ki chnong ki thaw.
Ha kani ka kynti hadien wa sdang i yakhih ki ASHA hapoh ka lama ka Meghalaya Asha Workers Union (MAWU) nadooh ka 19 tarik uni u bnai neidaw wym biang i su ka sorkar ya ki, ynne ka sngi u MDC ka Jowai Central, u Awhai Andrew Shullai da mih u chaphrang wow e yarap sñiawngooh ya ki ASHA ka Jowai UPHC kawa em ha Loomkyrwiang ha ka yalang wa pynman ha Hall ka Dorbar Chnong Chutwakhu.
Ya kani ka yalang da pynlai da u Waheh Chnong ka Chutwakhu, u P. Lyngdoh, wei da yoh leh i klam na u President ka Synjuk ki Waheh Chnong Jowai, u Alan Niangty wei kini ki waheh da e yaraoh ki ya ki ASHA kiwa da kreh khlem chong ngiah kam ha ini i por wa ktah ka khlam COVID-19. Da ong ki leh wa neidaw wa sangeh kreh ki ASHA kam ha ini i por, neiliang yong ki kamjooh ki bor chnong leh da dooh mynsien bha ki.
Neiliang u Andrew hawa e yei klam da ong u wa i thmu toh hadien wa da sakhi yei sdang yakhih ki wakreh ASHA kiwa da man haphrang dooh yong ka chnat i chait i khiah kiwa yatoh kaam wa ki paidbah khamtam hadien wa wan ka khlam COVID-19 da yoo u yei emkaam ya ki ASHA wei i sangeh kreh yong ki da man i kamwa da tkut ka yingkieñ wei ini i e yarap yong oo man i iwa khian bha.
Da kyrpaad u ya ka sorkar wow e yeiwa dawa ki wakreh ASHA wa kamjooh i emkaam yong ki yeiwa da kyntait na ki waroh chi kattu.
Chooh chooh da kyntu u ya ki wow pteiñ ki u e yarap ya ki chnong ki thaw neibhah khlem ki ym ye wow yakhun pyrchah ya kani ka khlam COVID-19.
Waroh ki ASHA na kani ka UPHC kiwa da yoh yarap ynne ka sngi da em ki 20 ngut.
