U Montri Rangbah ka jylla, u Conrad K Sangma, ynne ka sngi da wai u ya ka lehkmen dap 100 snem ka Dr. H. Gordon Roberts Hospital ha ka yalang wa da pynman ha pchem kani ka Hospital deiwa emlang u Symbood Montri Rangbah, u Prestone Tynsong.
Neiliang u Conrad da e khublei u ya kani ka Hospital kawa da poi cha uni u moomær deiwa ong wa kani ka sngi man ko leh ka sngi wow pynyoo yei sñiawngooh yei chakri u Dr. H. Gordon Roberts uwa dapoi ha Shillong ha u 1913 wei da sdang u ya ka Dispensary wa khian ha Mission Compound Shillong. “Hawa kyruiñ i chei lai luti ka Dr. H. Gordon Hospital wa i yarap ya ka imlang sahlang, neibynta ki paidbah e khublei O ya waroh ki wakreh nadooh ki warim hadooh kiwa katni yei e yarap ki i wym ye kheiñ de,” da ong u.
U Conrad da kynmoo u leh ya ki sngi wa em ka khlam COVID-19 wei da pynsñiaw u yei sñiawngooh yei kaam wa emkaam wa da leh ki heipor wa em ka khlam. Da ong u leh wa i chait i khiah toh iwa em hakhmat dooh ya ka sorkar wei da yooluti u wow ya krehlang wa ki Hospital yow pynku yei chait i khiah ki bru yong i.
Chooh chooh da kyntu u ya ka Hospital wow pteiñ ko yei kaam wa bha deiwa bood ya ki dak kreh u Dr. H. Gordon Roberts uwa da e yei chakri dei mynisen maya wa deiwa em leh yei mynsien wa sñiawthooh.
Kamtæ da e yarap u leh T. 20 lak cha ka Hospital yoh chna pynheh ya ka Hospital kawa da dep paan yarap chwa ka Hospital.
Hachwa ini, u Montri Rangbah da pynhær u leh ya ka lama dap 100 snem.
Kani ka Hospital katni em ko 350 tylli ki thaw thiah deilang waka Accident & Emergency, General Medicine, Obstetrics & Gynae, Psychiatry, Orthopedics, Child Health, Child Development Unit, Pediatric Surgery, Anesthesiology, Dental, Ophthalmology deilang wa ka Speciality wa Super Speciality wa kynthup ya ka 24×7 Service. Ka Hospital em ko leh ka College of Nursing kawa da tipmit da ka North Eastern Hill University.
