U snem 2020 da man u snem wa da sakhi yei wan ka khlam COVID-19, i krehkaam ka Lockdown weiwa da sakhi leh yei wan u slap ka la’ær wa joor ha Ri-loom Jaiñtia iwa da ktah ya ki manyung kiwa boon.
Ha kani ka kynti neiliang u MLA ka Jowai, u Wailadmiki Shylla da e yarap u da ka Special Rural Works Programme (SRWP) yong u 2020-21 cha ki 800 tylli ki manyung wa da chah ktah ha ka Lockdown wa ha u slap ka la’ær hapoh ki chnong waphær waphær ka Constituency heiwa mar kawi pa kawi ka manyung da yoh ki mar T. 5,000.
Ini i e yarap da sdang i nadooh u Thohlakhmi (February) uni u snem tangwa neidaw wa wan biang ka khlam ha ka sien wa ar wei da pynkrehkaam biang ya ka Lockdown, da thut ini i e yarap wei da ye wow pyndep du ynne ka 26 tarik donhi ha chnong Khliehtyrshi, West Jaiñtia Hills ha ka yalang wa tbian.
Ya kani ka yalang da pynlai da u waheh chnong ka Khliehtyrshi, u K. Rymbai uwa da ong u wa kam kiwa yoh myntoi toh u sñiawngooh ki yeini i yoh yarap neibhah wa man i kam i kyrkhu ya ki paidbah.
Da e khublei u leh ya u Wailadmiki uwa da kreh wow wanrah ya ini i yarap cha ki khon ka chnong neibhah ini i yarap daw ye i wow pyndap ya i emkaam yong ki ha yung ha sem.
Neiliang u Wailadmiki hawa e yei klam da ong u wa ha u snem 2020 da pynkrehkaam ya ka Lockdown kawa da ktah ya kiwa boon, da bood won sa u slap ka la’ær iwa da ktah ya kiwa boon tylli ki manyung wei heitu i por da kular u wow e yarap lyngba ka MLA Scheme cha ki 800 tylli ki yung hapoh ka Constituency.
Da ong u leh ini i e Scheme ye i u man i sien nyngkong heiwa da e da ka Cheque cha kiwa yoh myntoi neibhah boonsien ki bru ym yoh yarap ki deiwa pura kamtæ da rai wow e da ka Cheque khnang wa ka poisa u lai bait ko cha ka Account kiwa yoh myntoi wei ini man i kaam iwa khooid bha.
Chooh chooh da ong u wa boon ong ki neiyi i daw wa e yarap du T. 5,000 wei hajrong ini neiliang u Wailadmiki da ong u wa dang lah wow e kajiak cha kiwa boon ngut bar wow e chiboon cha ki kattu katni ngut donhi neibhah ka T. 5,000 em dor wei kordor ko cha ki bru kiwa dooh.
Heijooh i por da kyrmen u wa ini i yarap u man i iwa sdang wei da kyntu u leh ya kiwa ympu yoh yarap wa daw yoh yarap ki neini chaphrang neibhah ka Scheme dang boon ko.
