Ekti ki Regional Committee pynbait pood ka Ri-Bhoi wa West Khasi yeiwa chem ki

Ki Regional Committee wa da thung da ka sorkar wow pynbait ya u pood u ang wa ka jylla Assam, ynne ka sngi da ekti ki ya ka bui (Report) ha u Montri Rangbah ka jylla hadien wa da dep ki wow lai pait deilang wa ka sorkar Assam cha ki thaw khappood.

Ka sorkar da thung ko ya le tylli ki Regional Committee wow pynbait noh ya u pood u ang, wei ki ar tylli ki Committee kiwa da wan e ya ka Report toh yong ka Ri-Bhoi wa West Khasi Hills, katwa ka Committee kawa pait ya ka Jaiñtia Hills da paan por chooh chooh ki wow pynpoi ya ka Report ha lane chwa ka 15 tarik uni u bnai.

Hawa klam wa ki laad pathai khubor, u Prestone Tynsong uwa khlieh ya ka Committee yong ka Ri-Bhoi da kyntait u wow batai hajrong ka Report, tangwa da ong u wa iwa sah kattu toh ha ki Montri Rangbah yong ki ar jylla wow puræ bniah wow leh ya iwa emkaam.

Da ong u wa i kaamram yong ka Regional Committee toh wow lai pait ya ki thaw wei wow pyntip ya iwa chem ki cha u Montri Rangbah, heiwa da ong u wa hachwa wow em biang i yachem yong ki ar ngut ki Montri Rangbah (Assam/Meghalaya), u Montri Rangbah daw khut biang u chwa deilang wa waroh kiwa embynta wa u pood u ang, wa kynthup ya kiwa yahkhmat ki seiñ saiñpyrthai, kiwa synchaar Hima/Raij, ki seiñbhalang wa ki Autonomous District Council.

Related posts

Lada ka sorkar sñiaw ko wa emkaam palat ko wow wanrah luti rel ye ko wow lai chakhmat: Ardent

May 12, 2025

Hiar lai pait u Wailadmiki ya ki sarok wa da pynbna wow chna noh hapoh ka Jowai Constituency

May 4, 2025

Hawa kylli, u Prestone da pyntip u wa i ekti ya ka Report toh iwa jar jiar iwa ka Assam da leh ko neiliang yong ki hi wei daw phah ki cha u Montri Rangbah yong ki hi, wei ka Meghalaya ha u Montri Rangbah yong ka hi.

Neiliang u Renikton L Tongkhar uwa pait ya ka Regional Committee yong ka West Khasi Hills, da ong u wa i lai paitlang wa ka Regional Committee wa da thung da ka sorkar Assam toh i wym mih i yaphær yumut wei ki Report daw ya sariem ki, heiwa da pynsñiaw u yei kyrmen wa ka Committee yong ka sorkar Assam leh daw phah ko ya ka jooh ka Report cha u Montri Rangbah kamwa da chem ha i por wa pynman yei lai pait lai sylli.

Da ong u wa hadien wa da dep wow ekti ya ka Report, daw chong sa ha waroh ar ngut ki Montri Rangbah wow pynbait ya i por wow yachem neibynta wow lai chakhmat hawa yatoh wa ka kaam pynbait pood.