Shillong: Ka Mawkynrew Public Heath Centre da yoh ko yaka Ambulance wa da angnood da slem ha kani ka tayaw deiwa wan ekti da uwa mihkhmat ka thaaiñ u Banteidor Lyngdoh uwa man leh u Montri ka sorkar jylla.
“Kani ka Ambulance toh lyngba ka Chief Minister’s Relief Fund (CMRF) wei daw man ko i myntoi wa khroo ya kiwa chong chnong ka thaaiñ ha i por wa emkaam jhan ha i kjut i chitom wa ki jia wa sñiawsih,” da ong u Banteidor hawa klam ha ka yalang pynlait paidbah ya kani ka Ambulance.
Kiwi kiwa emlang ha kani ka sngi kynthup ya Dr. I. Syiem, In-charge Mawkynrew PHC, Dr. EK Nongbri, u Sordar ka chnong Mawkynrew, u N. Shylla, kiwa yahkhmat chnong, u President ka Synjuk ki Nongsynshar Shnong Mawkynrew, u K. Lyngdoh, Secretary, u Seibor Warbah, kiwa yahkhmat ka PDF wa kynthup ya u President u A. Rynjah, ki wakreh ka PHC deilang wa kiwi kiwi.
Ki bor pynlai kani ka thaw sumaar da ong ki wa deiwa yoh ya kani ka Ambulance daw pyndooh ko yei eh wa jooh chem ki manda emkaaam yei sumaar jhan, i sumaar rap paka deiwa hap pynkit cha Shillong kamjooh heipor wa kit ya iwa jia wa sñiawsih.
Kiwa chong chnong leh da pynsñiaw ki yei sñiawkmen wei da e khublei ki ya u Banteidor uwa da chimkhia wei uwa na i por cha i por da emlang u wow pait ya kiwa chitom wa jynjar. Da ong ki leh wa kani ka Ambulance da man ko i kyrkhu ya ki neibhah wa waroh chi kattu da chem ki yeiwa eh hawa em kiwa kjut wa chitom wa sñiawsih heiwa du wow thooh kari da lut por da ki phaw kynta.
Ha chwa ini i ekti ya ka Ambulance, u Banteidor da lum u ya kiwa chong chnong kiwa man kam ki warep na ki san tylli ki chnong ha Thangsning heiwa da e yarap u da ka poisa cha ki. Ini i lai e yarap man ko leh kam chibynta wow yarap ya ki warep yow kyntu ya ka kaam rep kaam riang wa ki kaam ri mrad.
Kiwi kiwa emlang ha kani ka yalang kynthup ki ya u Sordar ka chnong Thangsning, u T. Nongkhlaw, kiwa kitkaam chnong, kiwa yahkhmat ka PDF wa kynthup ya u President, u A. Rynjah, uwa ektien ka Party, u Seibor Warbah deilang wa kiwi kiwi. Kiwa yoh myntoi na kti uwa mihkhmat da em ki kamwa 100 ngut.
Hawa klam ha kani ka yalang, u MLA da ong u kam uwa mihkhmat kwah u wa ka roi ka paar wa i kitkhlieh neibynta kiwa dooh wa duk kiwa chitom u man i iwa kongsan dooh. “Nga kwah O wa kiyi kiyi ki yakrehkaam u man ki kiwa che wa kiwa tyllung ryntih neibynta i myntoi kiwa chong chnong ka Mawkynrew Constituency hi waroh kawi,” da ong u Banteidor.
