Shillong: Uwa yahkhmat ka Peoples’ Democratic Front (PDF) uwa man leh u montri ha ka sorkar jylla, u Hamletson Dohling da ong u wa i daw wa mih ki awri awra ha ki seiñ saiñ hima ka jylla boonsien mih ki na ki MDC neibhah wym em ka aiñ yut seiñ ha ki Autonomous District Council kamwa man ya ki MLA.
Da ong u wa ini i leh ki MDC da wanrah i yei eh i khoo ya kiwa boon ki seiñ kam ka PDF, UDP, Congress wa kiwi ki party.
“Ki MDC da leh ki katwa ngait, kat chawa yoobiang ki katwa ngait iwa da booh hei chitom ya ki seiñ. Ymtoh du ki party yong i, tangwa wot ki party kiwa heh wa rim chem ki i jooh hi,” da ong u.
U Dohling da ong u yeini hawa jubab yeiwa kylli hajrong i man i long ka party nei lai kyrchaan sa san ngut ki MDC ka PDF ya ka Executive Committee ka Khasi Hills Democratic Alliance (KHDA) wa yahkhmat da ka National Peoples’ Party (NPP) ha Khasi Hills Autonomous District Council (KHADC).
Da ong u wa hajrong ini i leh ki san ngut ki MDC wow kyrchaan ya ka KHDA wa kiwi won i yaphær ha ka party neiliang ka Central Working Committee (CWC) da thung ya ka Sub Committee wa em du soo ngut wow em waroh ki MLA ka party, kitæ toh u Banteidor Lyngdoh, u Hamletson Dohling, u Gavin Mylliem wa u Jason S Mawlong.
Da ong u leh wa ym ye u len wa em i yaphær yumut wa kajiak ha ka party kamwa man ha kiwi ki party wa rap heh, tangwa ka Sub Committee wa da thung da ka CWC daw bichaar ko yeini waroh wei ya ka bui daw phah cha ka party.
Discussion about this post