Ka Tep Kyndait Government U.P. School, Tuber Kmaichnong chiruplang wa ka Student Police Cadet (SPC) yong ka skur, da pynman ki ya ka Awareness Programme hajrong ka phang namo ka Theme “The harmful impact of drug abuse” ha ka 26 tarik uni u bnai kam chibynta wow pynem burom ya ka World Drugs Day kawa ka pyrthai waroh kawi da lehlang ko.
Ya ka yalang da pnynlai da u Headmaster yong ka skur, u Riquoma Rq. Laloo wei da yoh leh i klam pynche na ki Resource Persons wa kynthup ya ka Niwandaka Dkhar, u David D Warjri, SI Lad Rymbai Police Out Post wa na u Seibor Bamon, SI Lad Rymbai Police Out Post hapyrdi i ya emlang u Onickson Sumer, i/c Sub-Divisional School Education Officer, East Jaiñtia Hills District kam u kongsan.
Ka Niwandaka Dkhar, da batai bniah bha ko chaphang i Drugs wa em ha ki ar bynta, kawi toh ka Medicinal Drug kawi won ka Illegal Drugs. Deiwa ong wa ha kawi ka liang lai u na ka luti wa bha wow pynbha yei kjut i chitom yong u bru næ ka bru, ha kawi won ka liang, man u i jait dih wa pyrchah ya ka aiñ. Tæ kam ki khynnah skur, e ko ya ki yei sneiñ i kroo, wym hoi la kammon kammon leh ya li ngam pathan ha katæ ka thwai ka wym ye de u lait.
U Seibor Bamon da batai bniah u ya ki kaam ka Police Department, kawa da kreh chitom bha miet wa sngi wow pynduna næ pyndooh pyndam ya i Drugs. Ong u ka Lad Rymbai Out Post toh kawi na ki na ki thanat kawa ki bru yalai yawan luti ki deiwa em kut jait ki bru wa lai wa wan na kylleiñ, kamtæ hap ki u chong u pait, u sylli bniah yeini.
Hei klam u David D Warjri, da batai u chaphang ki boonjait ki Drugs, deiwa ong leh wa ki pulit hi daman ki ki wow yaleh pyrchah yow u ye u tem yei wan psiah kiwa dai chapoh ka chnong ka thaw. Kyntu joor u ya ki khynnah skur, wa ymtoh u tba ki tang u tba leh, yatoh silet won hadien dei wym ye de u uiñ kylla. Da ong chooh u leh wa, em chiboonjait ki jait Drugs hanla kattæ leh ki khynnah ymtoh u pyrkhat ki yeitæ. Da khana chooh chooh u wa em ka aiñ kawa eh bha, kawa khut ki ka NDPS Act, kawa ye u kset patok ya kiwa dai katkam i yoh wei chem ki pulit ki.
Ha kani ka sngi da saam ya ki khusnaam cha ki wajop ha ka Drawing Competition heiyatoh wa ka jooh hi ka phang, kawa da pynman da ka skur hi ha ka 25 tarik. Kiwa jop toh ka Banisha Lyngdoh hei nyngkong, ka Wanbiang Lyngdoh hei wa ar wa ka Dhwani Shylla hei wa le.
Neiliang u Onickson Sumer kam u kongsan, da e u i atai chiboon bha, deiwa e nongmuna wa yatoh wa ki khynnah skur. Da ong u, chisien pyrkhat, hawa pynman ya kam kini ki pynsñiawthooh cha ki khynnah skur, ki wym pu tip iyi iyi leh ya utæ u drok, sñiaw lakam wow li khana hi-eh ya ki. Tangwa ong won u kani man ko kawi ka laad wow pynche cha phi ki khynnah skur, wa ymhoi tang u tba phi leh. Da e nuksa u cha ki thaaiñ palatsor boonsien u pa næ u ma uwa dih duma sikret wa neini chakhmat ong u ya phi ki khynnah wow lai thied tangwa toh u jubab ymtoh de u lai phi hawa phah ki kamtæ. Ong bait wa dang kat i ym hoi u lai kam kini ki kaam. Ban joor bha u ya ki khynnah wa ymtoh u ong wow sikai ki mat u maad, ya litoh pathan dei wym ye de won u pyntkut yow kynjri wow chah kdooh heitæ i pynmyllien. Yoo li phah chbæh biri næ duma ki ha ki khon yong ki, kiwa dang man khynnah neibhah kani hi yah ko chei wow poi cha iwa bakla.
Ya ki kyntien e khublei da e da u Pynshngaiñ Phawa, Assistant Teacher yong ka skur, heijooh i por da pynkynmoo u ya ki aiñ chnong wa nadooh nachwa, da em ka aiñ ka wa eh bha kawa da khang pyrchah ya ki khynnah hapoh 18 snem i rta wow li thied biri sikret næ kiad. Lada chem ong u u pynchitom da kawa eh bha ka aiñ. Kyntu won u wa ki khynnah skur ymtoh u chim ki, næ lai ki, lada em kiwa phah ki kamtæ.
Da chim leh ya ka Pledge wou pyrchah nei ptnemkaam yei Drugs.
Discussion about this post