Em ki montri wa yahap wa kiwa ym yahap ya ka rai pynman Cabinet Meeting u Conrad cha baar ka nongbah Shillong

Shillong: Ha ka 10 tarik uni u bnai ka sorkar jylla daw pynman ko yaka yalang ki montri cha baar ka nongbah Shillong, deiwa sdang chwa ha Tura wei daw pteiñ leh cha kiwi ki District. Kani da man ko ka sien wa nyngkong wa ka sorkar da chim ko ko ya kam kani ka luti yow pynjan ya ka krehkaam ka sorkar wa ki paidbah.

Hawa yoh u thooh yumut na ki soo ngut ki montri ka sorkar, wa kynthup ya u Sniawbhalang Dhar wa ma ki le ngut ki montri wa thymme wa kynthup ya u Hamletson Dohling, u Samlin Malngiang wa u Kyrmen Shylla, da pynsñiaw ki ya i yohnong wa i dooh nong na ini.

Napyrdi kini ki montri du u Samlin uwa da pynsñiaw yei wow sñiaw yahap ya ini i rai u montri rangbah, u Conrad K Sangma.

“Ha i sñiawthooh yong nga, ym da yoo ware O wa daw wanrah ko ya i sñiaw yajan waki paidbah neibhah wa yaka Cabinet da pynman bait yaka ha kawi ka kamra kawa khang,” ong u Samlin.

Related posts

Hiar lai pait u Wailadmiki ya ki sarok wa da pynbna wow chna noh hapoh ka Jowai Constituency

May 4, 2025

Phah u Himanta wow tyngkheiñ yei kjat kiwa yaroh ya ka Pakistan

May 2, 2025

Da ong u leh wa da em ka Review Meeting wa pynman man ka leh bnai ha waroh ki District wei kani da man ko kawa biang wei lada lai cha waroh ki District wow pynman yaka Cabinet Meeting daw man ko kawa lut phut.

Hawa yaklam wa u Hamlet, da ong u, “Wow pynman yaka Cabinet Meeting cha Tura toh i thmu u montri rangbah wei i sñiaw i wa biang palat i rukom pyrkhat, wei ki bru leh yoh ki u pynsñiaw yei emkaam yong ki ha ki por wa em i ha ki District yong ki.”

Da ong u leh em hi ka lut ka sep tangwa heini heitai tangwa manda lai neibynta i bha, ka yoh nong em ko ha kiwi tawon ki liang.

“I kwah i wa ki paidbah u sñiaw yajan wa i, wei nga sñiaw yahap O yei rai yong u CM,” ong sa u Kyrmen Shylla.

U Kyrmen da ong u leh waka sokar toh u pait ko wa ini i leh ym pyndooh nong ko yaka sorkar.

U Sniawbhalang won da ong u, “Ym mut du ka yohnong, ki paidbah leh daw sñiawkmen ki wei sñiaw chngaaiñ ki.”

Da ong u leh wa lada kheiñ yaka bai lai bai wan ye u em i lut, tangwa daw yoh won yaka rai ka wow pynyoh nong rap boon.

“I ym toh u sñiaw i du yaka lut lada yoh yaka rai kawa chim i kawa bha tam, i pynlut chiphaw katwa ka yohnong won chiklur, deiwa man kamtæ daw yohnong hi ki paidbah,” ong u Sniawbhalang.