U National President ka National People’s Party (NPP) uwa man leh u Montri Rangbah ka jylla, u Conrad K Sangma da ong u wa hap wow chaniah ya ki bor pynlai Election wei hap wow pdiang yei rai wa ki paidbah da e ki, ymtoh wow ong wa man ko kawa bakla hawa ym jop ya ka Election wei hawa jop won toh kawa biang.
Yeini u Conrad da ong u hawa kylli, lada ka sorkar daw phah takit ko hajrong i pynbaad u President ka Voice of the People Party (VPP), u Ardent M Basaïawmoit uwa da ong wa ka Election kawa laitlooid wei kawa khooid man ko du ha KHADC ymtoh ha JHADC.
Hawa yaklam wa kiwa thoh khubor, u Conrad da ong u wa hap wow chaniah ya ki sahep yong ka Meghalaya kiwa pynlai ya ka Election.
“Katwon tylli ki Polling Station kwah phi wow phah takit? Hap phi wow chaniah ha ki bor pynlai ya kani kiwa man ki sahep yong i, ymtoh i wa em ha ki Polling Station næ ki bru yong ki seiñ wa em ha ki Polling Station”, da ong u.
Da ong u wa lada pait yei mih ha ki Election, em ki Polling Station wa jop lut du kawi ka Party wei ini ymtoh iwa bakla wei lada pyrkhat wa em iwa bakla lada jia kamni, daw hap u takit ya kawi pa kawi ka Polling Station neibhah daw em kiwi ki thaw wa yoh boon Vote da kiwi won ki Party.
Da ong u wa ym ye wow man kamwa da pynbaad deiwa pynrap wa iwa da jubab u MLA ka Jowai, u Wailadmiki Shylla toh iwa toh.
“Hap phi wow pdiang yei rai ki paidbah. Tangwa du neidaw wa khlem jop ha kitæ ki Polling Station u ong wa bakla katwa ha kiwa jop toh kiwa biang toh i wym ye u man,” da pynrap chooh chooh u Conrad.
Discussion about this post