Shillong: U Montri Rangbah ka jylla u Conrad K. Sangma da ong u wa ka sorkar u pteiñ ko wow yaklam waka sorkar Assam wow pynbait noh i kajia pood.
Hawa jubab yeiwa kylli u MLA ka North Shillong u Adelbert Nongrum uwa dawa wow chim ya ka rai da ka yung dorbar hajrong kani ka kaam, u Conrad da ong u wa u pood u ang ka Meghalaya waka Assam da liar dak katkam ka North Eastern Areas (Re-organisation) Act, 1971 kawa man i daw wa mih i kajia hapyrdi yong kini ki ar tylli ki jylla.
U Montri Rangbah da pyntip u wa ka sorkar jylla da ye ko wow pyllang ya ka sabut wow pynkhlan yei wow kam ya ki thaw wa kajia wei ya kini leh ye u rah cha ka yung kasari kam ki sabut.
Da ong u wa lada ki yalang na ka por cha ka por da pynman hapyrdi ki montri rangbah yong kini ki ar tylli ki jylla nalor ki Chief Secretary wow thooh ya ki laad ki luti wow wanrah ya ka luti wow pynbait tangwa ym em poi i kat chawa em leh.
Da em 12 tylli ki thaw wa yaknieh hapyrdi ka Assam waka Meghalaya wei kini toh ka Upper Tarabari, Gizang Reserve Forest, Hahim, Langpih, Bordwar, Nongwah Mawtamur, Pilangkata Khanapara, Deshdemoria, Khanduli, Umkhyrni Psiar, Block I wa Block II wa ka Ratacherra.
Da ong u wa ki thaw wa synchaar ki pharæng toh ki Hima Khasi wa dadep pynabi wa ki District wa marjan kiwa haap ha Assam katni, neibynta i thmu wa chipor kam wow khrong dan ym em ktah ko yei mantre katkam wa pyntip ki Hima Khasi.
Da ong u leh i pynbna wow phiah pood heiyatoh wa ki Constituency yong ka Legislative Assembly kawa da pynmih ha i por hawa chna ya ka Meghalaya toh kiwa mih na Assam wei kini daw pynche ko heiyatoh wa pood u ang ka United Khasi and Jaiñtia Hills District wa ka Garo Hills District.
Chooh chooh da ong u wa ya ini i phiah da leh ha u snem 1952, 1966 wa 1972 heiwa boon ki chnong da haap ki hapoh ka United Khasi and Jaiñtia Hills District wei katni toh u em ki hapoh ka Meghalaya.
Discussion about this post