Ha ka khubor wa da phah da u Saiñkupar Nongtraw, General Secretary ka HNLC, da ong u wa ka jaitbru Ynñiawtrep em ko ka hok wow kamai kajih dei burom katkam ka aiñ hanla dei chongdai cha rood sarok tangwa kamwa man katni waroh kini ki thaw da chim da kiwa na baar iwa man i hok ki tre chnong yong i.
Da ong u wa ini i iwa jia kattæ wow hiar thma yei khih i khan toh iwa da e laad pyn da ki yong i hi nadooh ki dorbar chnong, ka Hima Mylliem, ki District Council wa kiwi de ki chnat sorkar kiwa da dai khlem da em de i sarom ya ka mynried deiwa pynemkaam yei kyntien “NOC”, ki “Trading Licenses”, ki “Clearance” yow murieh yei baam tooh yow dai lilam ya ka chong ka thaw i kajiak chisien cha kiwa na baar hadooh wa man ki bru yong i kam ki bru para ha pynhapoh ka chnong yong ki.
U Saiñkupar da ong wa da em ki bru kiwa da kam ya idæ kam kitæ kiwa yaleh neibynta kiwa dooh wa duk kam ka Biolin Pyrtuh kamwa man kam ka President ka Meghalaya and Greater Shillong Progressive Hawkers and Vendors Association wa ka Angela Rangad kawa da psiah kam kam “Invitee Member” kawa man kam ka khlieh kani ka Association kiwa man kam kiwa chet kylla ya ka Ynñiawtrep.
Da ong u leh wa kini ki ar ngut deilang wa u (L) Tarun Bharatiya, man ki ym du kiwa kyrchaan tangwa kiwa yada ya kiwa na baar yow ye ki wow chim noh ya ki luti syngkieñ yow chongdai nadooh na Khyndailad cha Motphran. Da pynkylla ki leh ya kini ki thaw wa man kyntang kam ki thaw wow yoh nong kiwa na baar deiwa chim kabu yow yoh poisa na kini kiwa chongdai ki wym tip iyi iyi leh.
U Saiñkupar da kam u leh wa kamwa thooh bniah ki wa ka Angela Rangad deilang ka Biolin Pyrtuh da kamai ki na ini deiwa yoh palat Rs. 50,000 yow pynyoh thaw chongdai najrong wa khrong poisa ki man-u-bnai. Wei yeini da ye ki wow leh neidaw wa em kiwa na baar kiwa kwah wow pynskem yei thaw yooh kjat ki ha ka kamai kajih kiwa da smat wow leh yeini waroh. Wei ini ymtoh iwa jia hi-eh neibhah da yoo wa em boon kiwa na baar wa em cha ki luti syngkieñ kiwa da chim lut ya ka kamai kajih.
Kamtæ da ong wa ha ka HNLC, ka Angela Rangad wa ka Biolin Pyrtuh man ki kam ki kseiñ ki thalah kiwa da baam ya ka yurim ka imlang sahlang yong i wei iwa leh ki toh yow chet kylla yei hok kamai kamjooh ka thma pyrchah yow im-ja wei mantre ki jaitbru Ynñiawtrep.
Chooh chooh da ong wa ka Angela wa ka Biolin toh kiwa chet kylla ya ka jaitbru deiwa yachah wa kiwa na baar deiwa ngait thlah ha ka Indian Constitution kawa man ka laad wa kular wow e yei hok cha waroh kiwa man kam kiwa chong chnong ka India tangwa deiwa kyntait yei hok ki jaitbru Ynñiawtrep wow kamai i wym ye u pdiang.
“Cha kini ki kynthai kiwa kam wa toh ki jaitbru Ynñiawtrep, booh chwa ya ka jaitbru hakhmat. Ym mylliñ i yei khwan samen phi. Neibhah ka mynried ka jaitbru yong i dawa ko wa i hok ki bru, i mantre wow kamai kajih wan ko hakhmat bar yeiwa emkaam kiwa na baar. Yieñlang chirup wa ka jairbru lym kamtæ daw kynmoo ya phi kam kiwa chet kylla ya ka Ynñiawtrep,” da ong u Saiñkupar.
Discussion about this post