Kiwa sikai Upper Primary wa haap hapoh ka chatri ka All Meghalaya Govt. Upper Primary School Teachers Association, haka 15 tarik uni u bnai da pynman ko ya ka yachemlang wa phra næ ka 8th Annual General Meeting ha Jowai ha Community Hall ka Lion Mission Compound.
Ha kani ka yalang da wan chimbyntalang da ki para wa sikai na kylleiñ ka jylla Meghalaya wa kynthup na Garo, Khasi wa Jaiñtia Hills.
Ha kani ka yachemlang da yaklam yachem yumut ki heiyatoh i lai luti ka seiñ kamjooh i eh wa maad ki heiyatoh ka tulop katkam ka Meghalaya School Service Rules, (MSSR) 2025, heiyatoh ka Modified Assured Career Progression Scheme (MACPS) wei napyrdi ki para wa sikai em kiwa yoh wei em won ki wym yoh, neitæ ka Dual Charge Allowance nadooh u snem 2017 da toh u yoh 10% na ka Basic Pay neiwa jooh yoh nachwa 5% heiwa najrong wa man kam kiwa sikai da hap leh wow pait yei kaam Headmaster. Em leh kiwa sikai kiwa da paitlang yei kaam ki Headteacher da 10 bnai, em kiwa hadooh 3 snem leh yoh ki ya ka Allowance wa du 3%.
Neitæ da yaklam ki leh heiyatoh wa i chem chitom ki u pyndep ya ki Syllabus neibynta ki khynnah skur manda kiwa sikai kynthai yoh khon ki wei hawa kiwa sikai kjut chitom ki heiwa ym em thung da kiwa sikai chipor heithaw yong ki.
Wei da ñiawliar haroh ki hajrong i phah ka sorkar ya ki u leh chiboon kiyi kiyi la ha skur næ cha baar tangwa ym em won u pynbiang ki yei emkaam wa toh u leh.
Hadien ka yalang, neiliang ka General Secretary ka AMGUPSTA, ka Philomina Dkhar hawa pynsñiaw yei eh wa maad ki, khana haroh ko wa da thooh yutip ki naka chnat Education kiwa da jubab wa daw pait bniah ki yeini.
Ong ko iwa rap diaw chooh ki toh wa wot hapyrdi para wa sikai kiwa toh na kajooh ka chnat leh da pynhaap won ya ki ha jar jiar ki kyndon.
Heiyatoh wa ini i eh, ka Philomina ong ko wa dadep e ki dei thoh haroh cha ka Directorate ka chnat puræ puthi, cha u Commissioner wa cha u Montri i Puræ Puthi, u Lahkmen Rymbui.
Discussion about this post