Ka All Meghalaya Govt. Upper Primary School Teachers Association (AMGUPSTA) da pynman ko ya ka yalang yong ka kawa tip kam ka 8th General Annual Meeting ha Community Hall ka Lion Mission Compound, Jowai ha ka 15 tarik uni u bnai.
Hawa yaklam wa ka General Secretary ka AMGUPSTA, ka Philomina Dkhar da khana ko wa nyngkong dooh wa da angnood toh wow pynkylla ya ka MSSR 2025, heiwa da mih ka hukum wow phah leh ya ka Undertaking, kamtæ da rai wow lai rah yeini ha ka Department wa ha Directorate kamjooh ha u Commissioner of Education wa u Education Minister.
Da khana ko wa u Lahkmen Rymbui dang mut u wa kiwa sikai UP School toh kiwa kmen dooh tangwa khyrngiat u wa ki leh em ki chiboon i chitom.
Chooh chooh da ong ko wa da yakhun ki leh ya ka Meghalaya State Service Rules (MSSR 2025). Kiwi ki phang wa da yaklam toh wa i rukom su tulop, ka DPC, TSP, MACP wa i chah thung kiwa sikai DSC.
Ka seiñ da dawa ko leh wow em kiwa kreh wei i phah salan da kiwi kiwa sikai hawa em ki hei chitom, hawa kha khon neibhah lada ym leh kamni ym ye wow pyndep ya ka Syllabus neidaw wa duna kiwa sikai.
Heijooh i por da dawa leh ya ki Committee wow pait bñiah heiyatoh wow pynkrehkaam ya ki thong krehkaam yong ki.
Discussion about this post