U Montri Rangbah ka jylla, u Conrad Kongal Sangma da ong u wa kitu ki bru kiwa pynwandur da kamwi yei luti wa lai ka sorkar wow pynkyrriah ya ki bru na Them Metor toh u yaklam ki leh wa ki jaitbru Sikh kiwa sah ha Shillong wa ym em tang kajiak leh kamtæ.
U Montri Rangbah da ong ya ini hawa jubab wa ki jaitbru Sikh ha kiwi ki jylla da pynbaad ki wa ka luti wa jied ka sorkar Meghalaya toh wow pynkyrriah ya ki bru na katai ka thaw. Da ong u wa ki bru kiwa sah ha Them Metor toh kiwa yakhleh, tangwa lada lai kylli na ki jaitbru Sikh kiwa em ha Shillong daw khana ki yeiwa sakhiat, deiwa pynrap wa kam ini i rukom klam da mih leh neibhah kiwa boon ki wakreh hapoh ka Shillong Municipal Board toh ki Sikh, tangwa da em won kiwa thmu wow pynkylla rong da kamwi wei man ko iwa bakla.
Hawa yatoh wa i pynbaad u Secretary ka Harijan Panchayat Committee wa ka sorkar ka leh arsap deiwa e da u syntu da kawi ka kti wei da tynrah won da kawi ka kti, u Montri Rangbah da ong u wa ye ki wow pyrkhat katwa sñiaw ki, tangwa iyi wa ka sorkar ka leh ko toh wow pynbait noh chi syndon ya ki kynrum kynram, wei da phiah ha ki bynta waphær waphær wow pynbait ya i kaam ha Them Metor wei ka sorkar daw leh ko leh katkam ka aiñ.
