Ynne ka sngi u Executive Member ka JHADC wa pait ya ka chnat Trade, u Winning G Sungoh heipor wa pynman ya i kynreh ya ki kot ki sla ki baar jylla ha Mihmyntdu da ong u wa heiyatoh wa i thmu ka sorkar India wow pynkrehkaam ya ka Citizenship Amendment Act (CAA), da ong u, “Daw em bait i wan psiah ki baar jylla khamtam ha Ri-loom Jaiñtia heiwa ye u poi ki bru kam na Bangladesh, hanlada ka Notification ka sorkar pyrdi ong ko wa ya ki Schedule Area daw pynlait na kani ka aiñ (CAA), tangwa hei sakhiat won ha ki thaw wa em hapoh ka 6th Schedule ym em ki kyndon wa ye u kdoh yei wan ki bru na baar”.
Da ong u leh wa katkam ka 10th Para yong ka 6th Schedule da ebor ya ka Council wow chna ya ki aiñ wow yada ya ki tre jylla deiwa e nongmuna leh ya ka Jaiñtia Hills Autonomous District Council Trading by Non Tribal Act.
Da ong u leh wa heini da yoo wa em ka bynta wow yada ya ki tre jylla wei ye u jop lada ki Waheh Chnong kreh ki chirup wa ka Council khnang wow pyntikna wa ym em ki bru wa wan na baar wow seiñ khih namo wow kreh hapoh u pood u ang ka Council deiwa kyntu leh ya ki Waheh Chnong wow pait bniah ki yeini ha jar jiar ki chnong yong ki.
Chooh chooh da pynrap u deiwa ong, “Lada ong ka sorkar pyrdi wow pynlait ya ki thaw 6th Schedule na kani ka aiñ (CAA) leh tangwa ympu em ka aiñ neibhah wa da tip wa lada ka aiñ yong i tyngkhooh ko wa ki aiñ ka sorkar jylla wa ka yong ka sorkar pyrd, ki aiñ ka Council daw yap ko”.
Katwa kamtæ du i em ka Para 10 ha ka 6th Schedule daw yarap ko wow sonteri wei wow yada nei wan kiwa na baar hajrong wow e leh ya ki kyndon krehkaam ki Waheh Chnong wow pait ya jar jiar ki chnong yong ki.
