U Montri ka chnat Transport yong ka jylla, u Sniawbhalang Dhar da ong u wa hadooh katni ka sorkar India ym pu e dak ko wow booh yaka Airport thymme ha ka jylla, neibhah kamwa man katni, wow chna sa kawi ka Airport toh i kaam wa rap heh, wei neiliang ka sorkar jylla da yaklam ko wa u Montri ka Civil Aviation yong ka sorkar pyrdi, deiwa pynsñiaw leh wow yoh ya i mynjur neibynta ka Airport wa thymme ha ka jylla.
Hawa yatoh wa i pynheh ya ka Airpot kawa em ha Umroi, u Montri da ong u wa ka sorkar India ym kwah ko wow leh jhan ya ini i kaam neibhah daw boon i lut iwa hadooh T. 700 klur.
Hawa kylli, da pyntip u bar wow pynlut T. 700 klur neibynta wow pynheh ya ka Airport, neiliang ka sorkar jylla da phah lai thooh ko ya i thaw wa biang yow booh yaka Airport wa thymme, ka wow em ha East Khasi Hills næ Ri Bhoi District.
Katkam i pyntip u Sniawbhalang Dhar, wow chna ya ka Airport wa thymme, emkaam ya i thaw wa heh kamwa 2 Kilometer la 4 Kilometer, wei lada rap heh daw rap bha chooh chooh.
Ha iwi i liang u Montri da ong u wa em i tkoh ha i krehkaam yong ka Airport ha Umroi neidaw wa wan ka khlam COVID-19, wei em ki por wa ki lieñsuiñ krehkaam ki chisien chi tayaw wei em leh arsien chi tayaw na Shillong cha Delhi wa Kolkata, deiwa pynrap wa ka sorkar daw bichaar biang ko ya i rukom pynlai ya ki lieñsuiñ hadien u Wisu (March) uni u snem.
U Dhar da ong u wa i tkoh i krehkaam ka Airport toh neidaw wa em i yaphær yong ki kyndon yada COVID-19 na kawi ka jylla cha kawi won, wei manda tip ya ki, daw ye u bichaar bniah ya i krehkaam.
