U MLA ka Jowai Constituency, u Wailadmiki Shylla hawa wai yaka chlem e sikai yow man kam ki Web Developer wa da e dei mynkna lyngba ka Meghalaya State Skill Development Society (MSSDS) neibynta ki khon khynroo khyllood ynne ka sngi, da ong u wow yooluti bait du yei khih sorkar ha kini ki sngi wymtoh iwa suk u yoh neibhah wada boon waræ kiwa thap kreh ha man ki chnat wa lait kreh.
Kamtæ yow pynchlur ya ki khon khynroo khyllood u sdang yei khih katkam ka sap wa em ki, ong u wa neiliang ka sorkar jylla ha ki 5 snem chadien da wanrah ko boon ki thong neibynta ki khynroo khyllood wa kynthup ya ka ka Skills Meghalaya, Prime Hub wa kiwi najrong wot oo hi leh da dep pynman u ya ka e sikai hajrong kammon u sdang yei khih namo ka Business Startup.
“Kamwa haka Election Manifesto da ong i wa lada poi biang haka sorkar daw pyrchang wanrah 5 lak tylli ki kreh ha ki 5 snem wow wan, kani wym mut yei khih sorkar tangwa u pynyoh chooh chooh ki laad yoh khih lyngba ki laad waphær waphær katkam ka sap,” da ong u Wailadmiki Shylla.
Neitæ kam ki khynroo khyllood wa thooh khih iwa emkam dooh toh u pynpliah yow em i iwi i sap wa pliah bar yei tip boon tylli khnang yow man iwa myntoi.
Hawa kyntu u pynemkaam hok ya ka laad ka kabu wa yoh, ong haroh u wa hanla ka sorkar ym ye ko u leh lut waroh iwa emkaam ki paidbah tangwa pynyoo won ko ya ki laad ki luti.
Hawa kyntu won u wow pait dei khih wa ye u pynyoh nong, e nongmuna haroh u yei eh i khoo ha Jowai wa waroh da sakhi, katwa ha kiwi won ki thaw sor, ki seiñ wa boon, ki khynroo khyllood wa lai pure pna wan paan hi ki yei jhep neibynta u pynkylla spah deiwa pynemkaam heiwi won i rukom.
Wei deiwa leh kamni najrong wa wanrah ko yei khooid i suba man haroh ko kam ka laad yoh khih yoh kreh.
Ya kani ka chlem e sikai wow man kam ki Web Developer daw pynman ha Jaiñtia Institute of Technology (JIT) Jowai, dei kyrchaan ka Meghalaya State Skill Development Society wa em hapoh ka chnat Labour ka sorkar Meghalaya hapoh i pyrtuid ka Skills Meghalaya.
Ha kani ka sngi wai wa da pynman ha Auditorium ka Kiang Nangbah Govt College, da emlang ka Dr. E.M. Blah, Principal ka Kiang Nangbah Govt. College Jowai, u Lambormi Suchen, Skill Development Officer, West Jaiñtia Hills, u Bankitbor Marweiñ, Managing Director JIT Jowai wa kiwi haka yalang wa pynlai da ka Sandamiki Passah.
