Emkaam wow pynkylla ka Parliament ya ka Presidential Order 1950 yow pyndooh yei tipmit ya kiwi ki bru ri-loom: Pynshngain

Shillong: U Chairman ka Khasi Hills Autonomous District Council (KHADC) u Pynshngain N Syiem da ong u wa i eh ha ka thup yong kiwi ki jaitbru ri-loom ha kani ka jylla, toh neidaw wa da bakla wow dawa pyndooh ha i por wa yoh ya ka jylla na ka Presidential Order 1950.

Hawa yaklam wa kiwa pathai khubor ynne ka sngi, u Pynshngain da ong u wow pynkylla ya kani ka Presidential Notification 1950, emkaam wow leh da ka Parliament lyngba ka sorkar pyrdi.

Da ong u wa ka sorkar jylla, ka District Council ymye ki wow leh iwon iwon lait noh wow e da i thoh khnang wa ka sorkar pyrdi u leh ko yeiwa emkaam hajrong ini.

Da ong u wa hei sakhiat da toh ha kitu ki por wa yoh ya ka jylla Meghalaya wow dawa u pynkylla ya ka Presidential Order kawa da phiah na ka Assam lyngba ka Nort East Reorganisation Act 1971.

Related posts

Hiar lai pait u Wailadmiki ya ki sarok wa da pynbna wow chna noh hapoh ka Jowai Constituency

May 4, 2025

Phah u Himanta wow tyngkheiñ yei kjat kiwa yaroh ya ka Pakistan

May 2, 2025

Katkam wa ong u Pynshngain i yoh ya ka jylla Meghalaya toh wow krehkaam neibynta i bha i miat ki tre jylla tangwa ini waroh ymem u leh nadooh kitai ki por.

Kam wow pynkynmoo heini katkam ka Presidential Order 1950, em da ki phaw tylli ki jaitbru ri-loom kiwa da tipmit ha kani ka jylla Meghalaya neibhah wa da chim hi-eh na ka Assam ha i por wa chna ya ka Meghalaya.

Ka KHADC da pyrchah ko yei pynpsiah yei kyntien wow elaad ya kiwi ki jaitbru ri-loom næ ki Unrepresented Tribes ha ka Territorial Autonomous Council kiwa dang pynkhreh ka sorkar pyrdi wow pynkylla ya ka Sixth Schedule ka Riti Synchaar ka ri katni, neibhah wa da chna ya ka KHADC du neibynta ki Khasi, ka JHADC ya ki Jaiñtia wa ka GHADC ya ki Garo, ym ya kiwi ki jaitbru.