Ynne ka sngi ha ka yung dorbar chna aiñ ka jylla, u MLA ka Jowai u Wailadmiki Shylla da ong u wa ya ka jaitbru ki bru da tip da i ktien wa klam ki kamtæ da emkaam wow tipmit wei wow thooh ki laad wow pynneh ya ka ktien Pnar.
Da kyntu u ya ka sorkar wow sdang e yarap noh ya kiwa thoh kot ha i ktien Pnar neibhah kat dang lai i por da sdang wiar ki kyntien wei da sdang duna kiwa pynemkaam ya ka.
U Wailadmiki da ong u leh wa kani hi ka jooh ka ktien daw yarap ko manda pynbait ya u pood ka jylla uwa dang kajia wa ka Assam hadooh katni.
Chooh chooh da kyntu u ya ka sorkar wow chna ya ka Committee wow pyrkhat kammon wow yada wei wow pynchlur hei wow pynemkaam ya kani ka ktien lada ha yung næ ha skur neibhah lada sdang u esikai ha ki Class khian dei ktien wa klam ha yung daw yarap bha i ya ki khynnah ha i bor sñiawthooh yong ki.
