Shillong: Ki kattu katni ki bru samen wa ki seiñ da dawa ki wa waroh kiwa kreh ka sorkar jylla toh u pyntip ki ya ka spah (Asset) yong ki kamjooh kiwi ki laad kamai ki kamjooh leh ki yong kiwa hayung yong ki hapoh ka aiñ Lokayukta Act.
Deiwa pait ya ki kyndon ka Lokpal ka sorkar pyrdi wa ong wa waroh kiwa kreh ka sorkar pyrdi toh u pyntip ki ya ka spah yong ki wei kamjooh ki laad kamai ki man la u snem, u Convener ka Mait Shaphrang Movement, u Michael Syiem da dawa u wa ka sorkar ka jylla toh u hukum ko ya waroh kiwa kreh yong ka toh u leh ki kamjooh.
“Kiwa kreh sorkar nadooh u Montri Rangbah hadooh kiwa kreh khian kyrdan dooh leh toh u pyntip ki ya ka spah wa em ki kamjooh leh kiwi ki laad wa kamai ki chirup wa ki yong kiwa hayung yong ki,” da ong u Syiem.
Da ong u wa kam ka Lokpal, ka sorkar jylla leh toh u pynmih hukum ko heiwa waroh kiwa kreh yong ka toh u leh ki kamjooh.
Hei yatoh won wa ki seiñ saiñ hima da ong u wa kattu da jan ka election wei waroh ki party kwah ki yei synchaar wa khooid, emkaam wow pait yei sakhiat wow pynkrehkaam ya ka Lokayukta.
Deiwa pynksan wa ka Lokayukta Act toh ka aiñ kawa khlanbor bha kawa da chna kam ka Lokpal Bill, u Syiem da ong u wa boon hi kiwa mihkhmat tieñ ki ya ka Lokayukta Act neibhah wa haap pyntip ki ya ka spah yong ki, ki laad pynmih poisa ki kamjooh yong kiwa hayung yong ki, wei ka spah ka wym pyntip (Undeclared Asset) ka wa daw chim noh ya ka katkam ka aiñ.
Hei yatoh wa ini ka president yong ka CSWO, ka Agnes Kharshiing, da ong ko wa ym du ki montri sorkar, kiwa mihkhmat wat hadooh ki sahep sorkar leh murieh ki ya ka spah yong ki.
U Syiem da pyntip u wa ka Lokayukta Act em bor ko wow takit wei wow pynchitom ya kiwa suba wa baamtooh hapoh ynru bnai namo hapoh ar snem.
Da pynkut u deiwa ong wa hadooh katni ka jylla ympu em u thung ko yaki dkhot ka Lokayukta kiwa kynthup ya u Chairperson wa 4 ngut ki dkhot, wei neidaw wa da jan ka Election da yoo artatien u wa ka sorkar daw thung ko ya ka.
Discussion about this post