U MLA ka Congress na Mawlai, u Process T. Sawkmie da ong u wa ka Lockdown næ ka khang-sbak emkaam wow pteiñ ko lada pait yei ku kiwa yoh ya u khñiang COVID-19, deiwa pynrap u leh wa ka sorkar toh u pyrkhat ko leh ya ki paidbah kiwa dooh kiwa chem yei chitom i saja.
Da ong u wa kamwa man katni ka sorkar da chah ko wow wai biang ki dukan marbaam, tangwa kiwa dooh won ym em poisa ki wow thied ya ki mar wa emkaam ki neidaw wa da chah ktah biang i bor kamai yong ki wei wot ki dukan wa wai leh ym ye ki wow dai.
Heijooh i por da ong u wa ya i rai wow pteiñ næ pyndooh ya ka Lockdown chong i ha i stat ka sorkar deiwa pyrkhat leh ya kiwa dooh, hanla ka thong wa hakhmat dooh u man ko neibynta i chait i khiah ki paidbah.
U Sawkmie da ong u leh wa hanla ka sorkar pyrdi da rai ko wow pynlait ya u khoo wa khlem su cha kiwa em Card Rachon, ka sorkar jylla tip che ko wa boon ki manyung ym em ki ya kini ki Card Rachon wei emkaam leh wow pyrkhat ya kam kini ki manyung.
