Shillong: Hadien wa khih ma khih u khmi ha ka thaaiñ mihsngi, u Montri ka chnat Revenue wa Disaster Management, u Kyrmen Shylla da pynsñiaw u wa ka sorkar daw pyrchang ko katwa ye wow yada ya uwi pa uwi uwa chong chnong ka jylla lada khih u khmi wa heh.
Da pynsñiaw u wa ym ye wow pynsangeh lada jia wa wan ki bor ka rymaw tangwa ye wow pynkupbor ya kiwa chong chnong ka jylla kammon wow tip ki wow yada pyn ya idæ ha i por wa khih u khmi.
Hawa kylli ya i pynkhreh ka jylla lada khih u khmi wa heh, u montri ka chnat Revenue & Disaster Management da ong u wa u khmi ye u wow khih ha iwon iwon i por wei hadooh katni ym em wa ye u ong chwa, deiwa pynrap wa ka chnat dang pyrchang ko wow pynkhlan ya i pynkhreh ya iyi wa emkaam wow leh lada khih u khmi.
Hawa kylli lada daw khut u ya ka yalang wow pait yei pynkhreh yong ka jylla neibhah wa da khih ma khmi u khmi, u Montri da ong u wa lada emkaam, daw khut ya ka yalang yong ki sahep wow yaklam ya kani ka kaam.
Ha i jooh i por, da pyntip u wa neiliang ka sorkar da jooh sikai ko ya ki paidbah hajrong iwa emkaam wow leh lada khih u khmi.
U Kyrmen da ong u wa ini i pynkhreh daw yarap ko wow pynkhreh ya ki paidbah ya iyi wow leh lada khih u khmi lane ha iwon iwon i por wa wan ki bor ka rymaw.
Kam wow kdaw heini wa hapoh ka jylla u khmi wa khlanbor 4.4 haka Richter Scale da khih u ha Meghalaya ha i por kamwa 1:30 i step ka 2 tarik uni u bnai uwa sdang na Nongstoin.
