Emkaam yarap kiwa yoh HIV bran bran hapoh ri-loom Jaiñtia

Jowai : Ka sngi kynmoo warom ya ka World AIDS Day ha Jowai da pynman ya ka ha Conference Hall, u Deputy Commissioner, Jowai yow ya phyllu yumut ya waroh ki liang wa chem chitom ki seiñ wa kreh wa kiwa em HIV kamjooh leh yei eh i khoo ki bru wa im wa u khniang HIV.

Ka phang ha uni u snem toh “Hands up for HIV prevention” iwa mut wa emkaam ya waroh u yakrehlang yow yada na ka HIV. Hei yatoh wa ini da klam ka Dr. V. Laloo ka wa da klam chaphang ka HIV nadooh ki por wa chem nyngkong ya kani ka kjut wa ki rukom sumaar ya ka.

Yow sñiawthooh che wa kammon u lai cha khmat hei yatoh wa ka HIV, ki 5 tyllki ki seiñ wa em ha ri-loom Jaiñtia wa kreh wa kiwa em HIV wa kynthup ya ka VHAM, MCSWA, Breakthrough, JNP wa ka MEDUNET da yoh laad ki u pynsñiaw ya kiwa boon i wa ktah yei kreh ki man ka sngi tangwa waroh da ong ki wa emkaam u em ya ka Antiretroviral Therapy (ART) Centre hapoh ri-loom Jaiñtia neidaw wa i man ko kam ni ka wi na ki thaw wa dang ku bha kiwa yoh HIV katwa dang lai ki sngi.

Related posts

Khlaad noh ka Kong Nitaboris Biam

November 9, 2024

Sñiawkhia u Andrew Shullai ya i tlot i rukom pynmih poisa ka JHADC

November 7, 2024

Kani ka ART Centre dang em du ka wi donhi hapoh jylla ha Shillong kawa e yei sumaar kamjooh leh ya ki dawai cha kiwa em HIV yow pynduna ya u khniang HIV yow ye ki u im slem.

Ha Civil Hospital, Ialong man ko kam ka Link ART don hi ka wow li chim dawai hadien wa da dep leh yeiwa emkaam ha Shillong kawa chimpor kamjooh leh kawa haap lai man ka por.

Yow yoh sumaar ki dawai dachin na ka ART Centre haap pynbiang ya kiwa boon ki kot ki sla wei khamtam ya ki Birth Certificate chem chitom bha ki paidbah neidaw wa chim syad ki Muktiar (Lawyer) katwa ya u Legal Aid Lawyer u wow kreh dei mynkna ya ki piadbah u wow su tulop ka sorkar ym pu em thung ya oo.

Ini i chem chitom ki paidbah toh wa boon kiwa yoh HIV toh kiwa na palat chnong kiwa ym em i puræ puthi kamtæ da e buit wa ka ophis u DM&HO toh u e ki da ka Certificate wa pynsakhiat wa u/ka toh kiwa em HIV yow lait ki u phet kyllieñ kyllieñ yow pdiang ka ART Centre ya ki.

Kiwa kreh na ki seiñ wa boon leh ong ki wa dang emkaam u pynche paidbah chaphang ka HIV neibhah boon ki bru dang sniawthooh bakla ki ka.

Ya kani ka kynmoo warom ya ka World AIDS Day 2016 da pynman da ka ophis u DM&HO hei yakrehlang waka District Legal Services Authority wa ka Mihmyntdu Social Welfare Association.