Shillong: Ka Bharatya Janata Party (BJP) da pynbaad ko wa ka seiñ Congress kawa em hei bor synchaar ha ka jylla da yalok ko wa ki karkhana pynmih khyndaw bilat kiwa em hapoh jylla wow pynku dor sydet syndet ya i khyndaw-bilat khnang wow yoh ki u pyllang poisa ki neibynta ka Election MLA 2018.
Ka BJP da pynsñiaw ko yei suba wa joor hei yatoh wei ku dor syndet i khyndaw-bilat naka T. 280 cha ka T. 400 chi churia, iwa 35% na i dor tre, iwa ye u em iyi re iyi ha lyndet hapyrdi ki MLA ka Congress ka jylla wa ini.
Heijooh i por ka BJP da kop ko wa lada ka sorkar jylla ym ye ko u leh iwon iwon, ka seiñ daw chim ko ki laad wa khor pyrchah ka sorkar kamjooh kini ki karkhana, deiwa lai lyngba ki yung kasari.
U General Secretary ka BJP Meghalaya, u Bashailang Khongwir da pynsñiaw u yei mynsien wa khia hei yatoh wa ku syndet i dor ini i mar iwa da ktah joor ya ki paidbah.
Katkam i ong u Khongwir, em phra tylli ki karkhana wa pynmih khyndaw-bilat hapoh jylla kiwa kynthup ya ka Star Cement, Topcem Cement, Dalmia Cement, Hills Cement, Best Cement, Amrit Cement, Gold Stone Cement wa ka Maxx Cement wei kini em ki ha Jaiñtia Hills.
Uwi na kiwa yahkhmat ka BJP da kylli u leh wa kammon ka sorkar elaad ko wow pynku dor kini ki karkhana katwa ngait tangwa ya ka subsidy da kam ki da ki hajar klur man u snem.
“Da yoh yutip i wa em kattu katni ki seiñ saiñ hima kiwa emkti wa ki karkhana pynmih khyndaw-bilat wei da booh ko ya ka dhab wow takit wei wow chemtre yeini waroh” da ong ka BJP deiwa kam wa ymslem de daw sai madan ko yeiwa chem ko.
Ka BJP da pynbaad ko leh wa ini i leh ka sorkar khlem pait yei rukom kreh ki karkhana pynyoo che i wa em kiwa yoh myntoi na ki samen samen deiwa psiah ya ki paidbah.
“I khyndaw bilat wa pynmih na jylla dang toh i cha baar-jylla bar ya iwa dai hapoh jylla” da ong ka BJP.
Ka BJP da pynkut ko deiwa ong wa toh nei emkti ki bru ha ka sorkar wa ki karkhana samen da chah ieh-khonswet noh ka karkhana yong ka kawa tip kam ka Mawmluh Cherra Cement Limited (MCCL) kawa em ha Sohra.
Discussion about this post