Ka 4th Evening Super-4 Football Tournament 2022 wa pynman da ka Sports & Youth Affairs Committee ka Chutwakhu Social Welfare Local Durbar, Jowai da pteiñ biang ya ka ynne i janmiet deiwa pynkut ya ki yakhun Quarter Final kiwa dang sah ar tylli.
Haka yalehke wa nyngkong, ka Spartan da jop ko ya ka RARR FC da 6-1.
Ya ka Spartan da thap kool da u Jerrimon Shylla haka minit wa 23, 42, 43 wa 45, u Ker Pakma haka minit wa 15 wa u Samehi Langshiang haka minit wa 16 katwa ya ka RARR da thap da u Salang Pala haka minit wa 26.
Haka yalehke wa ar hapyrdi ka Carpe Diem waka Progressive 7, da kut da 2-2 hadooh wa kut i por, heiwa yaka Carpe Diem da thap kool da u Sahame Lyngdoh haka minit wa 31 wa u Gideon Mukhim haka minit wa 50. Ya ka Progressive 7 da thap da u Damehi Rngad haka minit wa 12 wa u Armo Rando Chullai haka minit wa 19.
Yow yoh ya kiwa jop da pynman daka Penalty Shootout heiwa da jop daka Capre Diem da 2-0.
Mynstep u pynman ya ki artylli ki yakhun Semi Final heiwa ka Future XI daw yachem ko waka Dongmihsngi Junior’s heipor 5:30 wei daw pynbood daka Spartan waka Carpe Diem heipor 6:30.
