U Montri ka chnat i chait i khiah ha Meghalaya u A.L. Hek, ynne ka sngi hapoh ka yung dorbar da ong u wa ka East Khasi Hills District toh kawa em boon dooh kiwa yoh Cancer iwa mih neiwa pynemkaam duma (Tobacco Related Cancer) hapoh ka India deiwa em hadooh 2/3 na kiwa yoh.
Da pyntip u wa 66.9% toh ki chynrang wa 43.1% toh ki kynthai kiwa yoh Cancer nei pynemkaam duma heiwa kiwa yoh Cancer ha rdang nei pynemkaam duma toh 31% ha ki chynrang wa 32.3% ha ki kynthai kawa man ka jait Cancer wa boon dooh.
Deiwa kheiñ won deilang iwa boon kiwa yoh Cancer, ka East Khasi Hills man ko kawa ar wa boon dooh hapoh ka ri.
Yeini da pyntip u wa toh katkam ka yukheiñ ka ICMR, National Cancer Registry Programme, Cancer Statistics 2020, kawa kheiñ yeiwa boon kiwa yoh Cancer katkam i boon wa em ki bru. Heiwa ka jylla da em ko ya ka Population Based Cancer Registry ha Civil Hospital Shillong kawa pait yaka East Khasi Hills, West Khasi Hills, Ri Bhoi wa waroh ka Jaiñtia Hills.
Da pyntip u leh wa kiwa yoh Cancer wa nadooh u 2015 da em ki 7,014 ngut, heiwa na kini ki chynrang toh 4350 ngut katwa ki kynthai 2664 ngut ha kini ki District.
Da pyntip leh wa ha kini ki District da em 3,281 ngut kiwa da yap na i Cancer heiwa 2,068 ngut toh ki chynrang.
