Jowai : Hadien wada yoh ya ka ujor na ki khynnah wa ki manbei manpa wa boon i duna ka Jowai Polytechnic, ynne ka sngi ka seiñ Jaiñtia Students Union hei yahkhmat u President ka seiñ u Rikut Parieñ chirup wa ki nongthoh khubor da hiar ki cha kani ka thaw e sikai.
Da yoh leh u yachem wa u Principal kani ka Polytechnic u ma A Khongphai da pyntip u wa katni dabiang lut ki nongsikai ha waroh le tylli ki rukom sikai kiwa kynthup ya ka Costume Design and Garment Technology, Automobile Engineering wa ka Architecture Assistanship.
Katwa ya ki tiar ki kor kiwa emkaam wow pynyoo næ kiwow leh practical dang duna bha ki khamtam ki tiar neibynta ka Automobile Engineering wei da em leh ki tiar wa poi thymme tangwa ympu dep u pyndait ya kini ki kor. Heijooh i por ki khynnah da ong ki wa lada ym biang ki tiar wow leh practical tæ mynried manda kreh ki daw artatien ki (ym em confidence) iwym miat ya ki.
Ki khynnah wa puræ Costume Design and Garment Technology da ong ki wa dang duna bha ki kor soor neibhah wa duk ki khynnah u yaknieh ya ki kor soor ha kani ka kamra sikai soor. Heijooh i por da pyntip ki nongsikai wa lada jia wa sih ki kor tæ haap phah wan ki da ki bru na lait wei kamjooh leh em ki kynti wa duk ki u chna ya ki kor pyn da ki hi.
Neiliang u Principal da ong u wa dang duna bha ka um khamtam heini i por pyrhaw neibhah wa hadooh katni ympu ye ka PHE u pynpoi um ha kani ka polytechnic wei katni dang pynemkaam ki da ka um na thlu-um wa em pyn ha kani ka thaw e sikai wei em leh ki por wa duk ki u thied dei thied ya ka um.
Discussion about this post