Ka Meghalaya Weightlifting Association (MWA) chirup i krehlang wa ka yung krehkaam u District Sports Officer da pyntip paidbah ki wa ka 2nd Meghalaya State Weightlifting Championship daw man ko myntu u snem ha Jowai haka 26-10-24, ha Yungwalieh ka Dorbar Chnong Tpep Pale.
Kamtæ neiliang u Donald Rymbai, President ka Meghalaya Weightlifting Association, hawa klam cha kiwa thoh khubor da khut kyntu kyrsu u ya ki khon khynroo khyllood ka Ri-loom Jaiñtia khamtam kiwa na chnong Jowai wow mih ya chimbynta ki ha kani ka jait yalehke kawa sñiawsuk wei kawa da bna naam leh ha ka Olympics kamjooh ka Asian Games.
Da ong u wa kamwa man kattæ dang du uwi donhi na Ri-loom Jaiñtia uwa yalehke Weightlifting uwa pyrtuid Fabregas Lyngdoh na ka chnong Rymbai, East Jaiñtia Hills District.
I daw wa kwah pynman ya kani ka yalehke ha Jowai ong u toh wa ha u snem 2025 ya ka Meghalaya Games leh daw pynman ha Jowai, kamtæ kwah bha ki u mih boon kiwa na Jowai wow chimbynta ha kani ka yalehke.
Da pynkynmoo u leh wa na ka 1st Meghalaya State Weightlifting Championship wa pynman ha Nongpoh da yoh ki boon ki khynnah wa mih yachim bynta ha ka Meghalaya Games 2024.
Pyntip u leh wa chwa ka sngi pynman ya kani ka lympung daw em chwa ka pynyoo nongmuna namo ka Demo ha ka 25-10-24 yow sikai kammon i rukom chimbynta ha kani ka jait yalehke wa daw pynman ha Tpep Pale hi.
Neiliang u District Sports Officer, u K. Passah uwa da emlang ha kani ka sngi, oo leh pdiang sñiawbha u yei wan kani ka jait yalehke ha kani ka District, wei kular u leh wow ya krehlang.
Heijooh i por najrong wa kyntu u ya ki khynroo khyllood wow ya chimbynta, khut haroh u ya ki paidbah wow wan pait ke neibhah kani da man haroh ko ka Olympic Sports.
Hei yaklam wa ka bei u Fabregas Lyngdoh, ka Dayophi Lyngdoh khana ko wa u khon yong ka nadooh i rta wa 12 snem da sdang yalehke Weightlifting u, wei ha ka Meghalaya Games wa chimbynta u ini wa dep leh da yoh u hei wa ar.
I poi chimbynta u kam kani ka jait yalehke leh toh ka hi wa pynchlur ya oo hadien wa yoo ko yei khlan bor wa em ha oo, kamtæ da phah lai sikai ko oo ha Don Bosco Shillong wa em u Coach wa e sikai.
Kamtæ kmen ko wa i sap wa yoo ko ha oo man sakhiat iwa jop, wei kattæ leh em u cha Sikkim wow chimbynta ha kam kani hi ka jait yalehke.
Yow tip bniah ye ki paidbah u Phone ha kini ki Number-8729992091/8730837484, næ email ha [email protected].
Da emlang leh ynne ka sngi wa u Anthony Kharnaior Joint Secretary ka MWA wa kiwi.
Discussion about this post